Har du ei bankers oppskrift på noko så enkelt som sukkerbrød, spurde bror min. Sukkerbrød får du ferdigbakt, men dei er verkeleg ikkje gode, fulle av konserveringsmiddel som dei er. Er det krise skal ikkje eg sette meg til doms over nokon, men eg unngår i det lengste å bruke butikksukkerbrød.

Eg huskar ein gong eg vann på eit kakelotteri, eg vinn så sjeldan så eg var over meg av lykke. Dette var medan eg studerte, og eg inviterte masse vennar til å dele kaka med meg i lunchen. Så kom ei anna venninne av meg forbi, og eg såg kor ho rødma frå genseren og opp. Det var ho som hadde levert kaka, og ho hadde teke eit kjøpesukkerbrød og smurte eit glas med hapå på som glasur. Ganske triste greier altså, ikkje stort å dele.

Sukkerbrød er eigentleg ganske enkelt å lage, men du må bruke ein ordentleg miksar. Eggedosisen må vere stiv og fin, det er hovudsakeleg den som hevar kaka. Bakepulveret er berre med som ein slags støttehjul.

Ikkje er det feit kosemat heller. Begrensar du mengda krem, og fyller med deilig frukt så har du ei ganske kalorisnill kake når det først skal vere fest. I vår familie finst det ein klassisk versjon av bløtkake, og den heiter pærekake. Kvar gong nokon har bursdag må vi ha pærekake, og eg kan sverge på at far min kan ete ei heil åleine.

Søstra mi var utvekslingsstudent i USA på åttitalet, og lengta frykteleg heim. På bursdagen sin sette ho himmel og jord i bevegelse, og lagde pærekake til familien sin. «It’s different» var det beste dei kom på å seie. Det reduserte ikkje heimlengten. Slik gjer du det:

Pærekake

Til rund form 22 cm.

3 egg

90 g sukker

60 g kveitemjøl

30 g potetmjøl

1/4 ts bakepulver

Til rund form 26 cm.

6 egg

180 g sukker

120 g kveitemjøl

60 g potetmjøl

1/2 ts bakepulver

1/2 liter kremfløte

1 boks hermetiske pærer

1 flaske sjokoladesaus

Sett omnen på 160 grader, ikkje varmluft.  Knekk egga i vispebollen, og ha i sukkeret. Pisk dette til stiv eggedosis, det tek gjerne 10-15 minutt. Bland saman det turre i mellomtida, og gjer forma klar ved å dekke botnplata med matpapir og knepp den igjen. Pass på at kanten på botnplata vender oppover, vender den ned kan røra renne ut.

Ta bort vispen, og ta bollen av maskina. Bruk ein halv ballongvisp eller liknande, og vend mjølblandinga forsiktig skei for skei inn i eggedosisen. Hell røra i forma. Steik kaka på 160 grader i ca. 35 minutt, på nederste rille.

Når kaka er steikt, tek du den ut av omnen og vender den på ei rist. La den kolne der, gjerne over natta. Del kaka i tre ved å skjere eit jamnt, vassrett kutt inn i kaka rundt heile kanten. Legg ein sterk sytråd inn i kuttet, og dra den fram og tilbake til du har delt frå øverste laget av kaka. Gjenta dette slik at du til saman har tre lag.

Dynk kaka med safta frå pæreboksen. Den skal ikkje vere våt, men saftig. Pisk halvparten av kremen, og smør halvparten av det igjen på den nederste delen. Del pærene i tynne skiver, og legg dei utover kaka. Legg på neste lag, ha på krem og pærer. Avslutt med eit godt lag med krem over heile kaka. Lag eit rutemønster (eller kva som helst slags mønster, eigentleg) med sjokoladesausen. Server med kaffi og solo med sugerør.