Våren har gleda oss ei stund no, og då får eg lyst på grønsaker i alle variantar. Sunne,  gode og lettetne. Greske grønsaker er grønsaker som har blitt surra i olivenolje, og så fått dampe i vin, krydder og buljong til dei er møre. Dette er deilig tilbehør viss du skal grille, men dei kan og passe godt til ei steik, til grilla fisk eller ganske enkelt til ein kvardagskjøttpudding. Med grilla haloumi er den ein komplett, kjøttfri middag.

Finn du denne retten på ein fin restaurant vil den heite ”a la greque” til etternamn, Rustikk mat har blitt moderne igjen, og bondekosten har kome inn på kjøkkenet att. Tom Victor Gausdal si bok om husmannskost vart kåra til verdens vakraste kokebok, så det er umoderne å servere bittelitt mat i eit tårn på tallerkenen. Bondekost skal det vere!

Eg syns det er så godt å gå i butikken og la meg inspirere. Handlelapp er til såpe, havregryn, mjølk og brød. Middagen vil eg handle inn til på inspirasjon. Utvalet varierer, og då er det viktig å ha nokre oppskrifter i bakhovudet der du ikkje er avhengig av at butikken har aubergine eller avokado.

Greske grønsaker er ei slik oppskrift, sjølv om nokre element er faste. Paprika må alltid med, men du kan variere fargen. Løk må sjølvsagt og alltid med, men eg har enno ikkje sett ein butikk gå tom for løk. Gulrøter er og ein sikker vinnar, og fell i same kategorien som løk; alltid med.

Trikset med denne retten er å la grønsakene få den koketida kvar type treng. Dei harde grønsakene må i først. Dei mjukaste grønsakene skal berre vere med ei lita stund. Difor vert det best om du surrar desse kvar for seg. Du kan og lage denne retten utan gulrøter. Då går det naturleg nok raskare. Slik gjer du det:

Greske grønsaker

1 gulrot (eller 2 små)

Ein halv fenikkel

Ein halv squash

Ein løk (eller ein bunt med vårløk)

To paprika, gjerne forskjellig farge

5-6 sjampinjongar

2 fedd kvitløk

1 ss korianderfrø

2 laurbærblad

3 ss sherryeddik eller eplesidereddik

2 dl kvitvin

5 dl hønsebuljong eller grønsaksbuljong

Sitronsaft

Rens og skrell alle grønsakene. Skjer gulrot, squash og fenikkel i skråskorne bitar. (Berre fordi det er pent…) Gulrot- og fenikkelbitane bør ikkje vere for store, for då vert koketida for lang. Skjer løk og sjampinjong i båtar, paprika i strimlar og hakk eller press kvitløken.

Varm oljen i ei lav, vid gryte, og ha i kvitløk, paprika, squash og sjampinjongar. Fres dette til det mjuknar, og ha det i ei skål. Ha litt meir olje i gryta, og ha i laurbærblad, korianderfrø, løk, gulrot og fenikkel. La dette frese nokre minutt, og slå over eddik og vin. La dette koke inn til nesten ingenting. Har du ikkje vin, så bytt den ut med eplejuice og ha i litt meir eddik enn i oppskrifta.

Slå på buljongen, og la det koke 5-6 minutt. Ha i resten av grønsakene, og la det koke i 2-3 minutt til. Kontroller at gulrøtene og fenikkelen er møre. Fisk grønsakene opp av gryta, og legg dei på eit fat. Kryst litt sitron over, og kvern over svart peppar. Grønsakene skal serverast avkjølte. Krafta kan du koke inn og servere til, eller spare til ei suppe eller ein saus du skal lage.