Det er tida for ønskelister, og eg er spesielt interessert i dei duftande listene.

Eg veit at mange av mine parfymevennar har lister over parfymar dei planlegg å kjøpe, og dei som ikkje har komt i hus til i desember bør vel stå på ei slik liste. På mi ønskeliste står det også nokre dufter, nokre er å få tak i i Norge, andre må ein utanlands for å finne.

Den første på mi liste er Belle d’Opium. Den originale opium-dufta blir for voldsom for meg, eg har brukt den frå ei lita krukke med bodycream som eg har, men bortsett frå det blir den for dominerande.

Belle d’Opium, derimot, er atskillig lettare å gå med, og er ein moderne, varm og tiltalande floriental med fruktnotar og kvit peppar for å balansere.

Den andre på mi personlege liste er Kenzo Femme. Vanlegvis slår Kenzo på stortromma når dei lanserer ting i Norge, men ikkje denne gongen. Kenzo Femme har meir eller mindre blitt lirka inn bakvegen i norske parfymeri.

Det er synd, for det er ei god duft. Kenzo Femme er ein woody floral med musk i basen. Blomenotane er fresia og peon, og eg likar kombinasjonen mellom trenotane og dei friske blomenotane. Det gjer at den ikkje blir for søt på meg.

Kenzo Femme (og Homme, som vart lansert samstundes) er ein limited edition som vart lansert i samband med 40-årsjubileet til motehuset Kenzo.

Den siste på lista er ein ekte juleparfyme, Estée Lauder Sensuous Noir. Eg har den originale Sensuous, og sjølv om den er ganske søt så syns eg den er veldig behageleg, og dempa til å vere ei Lauder-duft.

Sensuous Noir er som namnet seier mørkare i tonen, mindre søt og meir krydra. Den har også trenotane lenger fram i duftbildet enn Sensuous har.

Sånn, det var mine. No vil eg høyre: Kva står på di ønskeliste? Det treng ikkje vere dufter, eg er nysgjerrig på andre ting du gjerne vil finne under juletreet også.  Fortell, fortell!