Tidlegare har eg slått eit slag for dei gode, men akk så attgløymde fondygrytene som står rundt om i skap og kjellarar. Eg har skrive om ostefondy, men eg har også prøvd meg fram med kjøtfondy med olje og med buljongkraft.

Her får du oppskrift på buljongfondy, altså kjøt kokt i ein rik buljong.  Fritert kjøt treng ein eigentleg inga oppskrift på, det er lett at du kan lage det utan mi hjelp.

Min kjøtfondy med buljong er litt asiatisk prega, eg har høyrt at dette er ein japansk måte å ete kjøt på. Kanskje brukar dei kjøtet av den berømte Kobe-oksen, som visstnok lever herrens glade dagar med massasje kvar dag, og drikk øl som andre kuer drikk vatn. Den er for dyr for oss, så vi held oss til Norsk Raudt Fe, det er også førsteklasses kjøt, som egnar seg godt til denne retten.

Når kjøt vert kokt, vert det først seigt før det sakte men sikkert vert mørt. Når vi lagar kjøtfondy er vi svoltne, og vil ikkje vente vinter og vår, så difor foreslår eg at du kjøper skikkeleg godt mørna indrefilet, like før datoen går ut, og så skjer du den i ganske tynne skiver. Då vert kjøtet raskt ferdigkokt, det vil seie lettygd.

Eg brukar å marinere kjøtstykket før eg skjer det i skiver, og marinaden puttar eg i buljongen til slutt, for å få ei nydeleg kraft til slutt. Du kan og blande kjøt, ta litt indrefilet av svin, litt kyllingbryst og kanskje til og med ein liten lammefilet i skiver. Slik gjer du det:

 Biffondy med asiatisk vri

800 g kjøt

4 ss salt soyasaus

2 ss søt soyasaus (Ketjap manis eller liknande)

2 ts finhakka ingefærrot

1 stor raud chili (dei største er mildast, utruleg nok!)

2 ss lys eddik (riseddik eller kvitvinseddik passar fint)

2 ss mild matolje

1,5 liter vatn

Buljong, enten pulver, terningar eller flytande.

Finstrimla grønsaker som til dømes gulrøtter, kål, vasskastanjar, stilkselleri og løk

1 fedd kvitløk

Litt sitronsaft

4 dl jasminris

8 dl vatn

Legg kjøtet i heile stykke i ein plastpose. Bland alt som skal i marinaden, og ha det oppi posen. Sug ut lufta av posen, og knyt att. Dette kan du gjerne gjere om morgonen før du skal servere fondyen.

Kok opp vatnet til buljongen, og ha i buljong. Ta litt mindre enn det som står på pakken, i løpet av koketida kokar den inn og vert saltare, og marinaden har og med seg salt, så du bør halde litt tilbake på saltsmaken. Ta kjøtet ut av posen, og ha marinaden oppi gryta saman med ein sprut sitron. La krafta koke opp, skum eventuelt av viss du ikkje vil ha det så sterkt, og viss det kjem proteinstoff frå kjøtet i krafta. Dess lenger chilien får koke med, dess sterkare blir buljongen. Some like it hot, og gjer du det kan chilien få vere med vidare.

Medan buljongen putrar på komfyren set du på risen. Kok opp 8 dl vatn med ei klype salt og ein sprut sitron, og ha i risen når det kokar friskt. Sett ned effekten på plata slik at det berre så vidt kokar, rør rundt, og legg på loket. No kan du gløyme risen i 12-14 minutt, då er den ferdig. Skjer kjøtet i tynne skiver (mindre enn 1/2 cm om du får det til), og legg dei fint på eit fat, gjerne eit per person. Kutt  grønsakene i tynne strimlar, og finn fram nokre gode sausar. Eg brukar Teryaki-soya, ein søt chilisaus og litt yoghurt i kvar sine skåler, den siste er mest for å kunne ta ei skei i munnen viss det vert for sterkt.

No er det heile klart til servering. Eg brukar ganske enkelt husholdningshyssing til denne fondyen, gaflane som følgjer med grytene held ikkje på kjøtet når det vert kokt. Knyt ein hyssing rundt kvar kjøtskive, og senk den ned i buljongen. Etter eitt par minutt er kjøtet kokt, og klart til å etast med ris og sausane til. 

Så kjem siste del av moroa: No har buljongen kokt inn, blitt smakfull og god, og den har sugd til seg masse god kjøtsmak frå fondykjøtet. Vil du vere nøye, silar du no krafta, kokar den opp på nytt og har i dei finkutta grønsakene. Det skal ikkje vere mykje grønsaker, det er ikkje kjøtsuppe du lagar, og dei skal berre såvidt bli gjennomvarme. slik at dei fortsatt er sprø og gode. Tre-fire minutt er nok koketid.

Dette avsluttar måltidet, det er nydeleg å slurpe i seg den varme krafta og kjenne gleda breie seg i kroppen. Mmm!