Her kjem endå ei Heidi-oppskrift, eg er på tur ut i verda, og kjem til å ha begrensa høve til å poste fram til fredag. Så det du ser frå meg denne veka er i hovudsak lagt ut på førehand.

Ikkje desto mindre; Heidi lagar Chili con carne, og det gjer eg og rett som det er. Der Heidi brukar buljong brukar eg pils, altså som væske i gryta. Det gjev ein litt annleis, meir “vaksen” smak. Forøvrig er det den einaste varianten av pils eg får i meg, eg har aldri klart å lære meg å like det. Lykke til med chilien! 

Alt godt

Denne retten er eigentleg ei bønnegryte med kjøtdeig og ho er aldeles nydeleg. Den er ein del av det texansk-meksikanske kjøkkenet, og dette er billig og mettande mat, særleg om du serverer den med ris til som eg gjer. I Mexico får du den oftast servert utan ris, berre med brød.

Gryta er fin å lage dersom du skal lage middag til mange. Det finst mange oppskrifter og her er ei.

Chili con carne

2 fedd kvitløk

2 løkar

1 raud paprika

ca 500 gram kjøtdeig

1 dl tomatpuré

1 boks hermetiske tomatar

1 ts buljong

½  ts chilipeppar

Litt tørka oregano

Litt tørka timian

1 ss spisskummen

1 boks hermetiske brune bønner

Litt vatn slik at det vert passe tjukt

Hakk kvitløk og løk og steik han gyllen på middels varme i ei stor gryte. Skjer paprikaen i terningar og tilsett. Ha i kjøtdeigen, og steik den saman med løk og paprika medan du smuldrar den opp med ein trespade eller liknande. Tilsett dei andre ingrediensane.

La gryta småputre i 25 minutt. Smak til med salt og peppar, og litt sukker viss tomatsmaken vert for skarp. Server gryta med ris og godt brød til.