Vi fekk ho som ikkje lenger er tenåring på hyggeleg besøk frå Trondheim i helga, det er alltid like stas. Dessverre hadde vi ingen gjøkalv å slakte, derimot hadde vi nokre aldeles nydelege andebryst som vi tok fram i høve besøket. Det er vel så nær gjestens favorittmat som vi kan kome, så det vart sett stor pris på.

Eg hadde handla polkabeter, for å vere med på Green Bonanza si store beteutfordring, og gjesten fastslo med ein gong at ho ville vi skulle lage betechips. Så ho og broren vart sett til å kutte betane i tynne, fine skiver, og så vart dei rista med olje til dei var gylne og sprø.

Til andebrysta laga eg ein klassisk plommesaus, den blir alltid suksess. Prøv den, den er veldig god til heilsteikt svinefilet og.

Polkabetechips

Fire polkabeter

Olivenolje

Nokre klyper salt

Kutt polkabetene tynt, bruk gjerne mandolin om du har. Eg hadde ungdommar i huset, som kutta i veg. Legg chipsa utover bakepapir på eit brett, og pensle dei med olivenolje. La dei bake på 160 grader i 20-30 minutt til dei er gylne og sprø.

Salat med avokado og cherrytomatar

To hjartesalathovud

Ein neve sukkererter

Eit beger cherrytomatar

Ein avokado

Skyll og tørk salaten, og snitt den så fint som du likar. Ha den i ein bolle. Kutt sukkerertene i cm-breie stykke. Del tomatane i fire. Del avokadoen i to, fjern steinen og grav ut fruktkjøtet med ei skei. Lag vinaigrette, og hell ca. ein tredjedel over salaten. Vend salatblada rundt med dressingen. Fordel over sukkererter, cherrytomatar og avokadobitane, og ringle over ca. ein tredjedel til. Server resten av vinaigretten ved sidan av.

Vinaigrette

2 dl god olivenolje

1 dl kvitvinseddik

1 ts sennep

1 ts honning

Salt og peppar

Bland saman alt til dressingen i eit glas med lok, og rist dressingen saman. Du kan også blande alt i eit høgt beger, og køyre vinaigretten glatt med ein stavmiksar.

Andebryst

Ca. 150 g andebryst per person

2 ss olje

 Salt og peppar

Snitt skinnsida på andebrysta på skrå ned til (men ikkje i gjennom) kjøtet med ein sylkvass kniv. Den enkle måten å gjere dette på er å legge dei oppå ein asjett, då kjem du til med kniven samtidig som du har betre kontroll på kor djupt du kuttar. Salte og pepre andebrysta godt. La dei ligge litt.

Varm opp oljen i ei romsleg steikepanne på høg varme. Legg i andebrysta, og la dei steike på høg varme til skinnet er sprøtt og lysebrunt. Ta ut brysta og legg dei til side, gjerne over i eit eldfast fat. La dei gjerne kvile i steikeovnen på 80-100 grader medan du lagar sausen.

La all den deilige gugga som er i panna bli der, det treng du når du skal lage saus.

Plommesaus til and

2-3 ss sukker

3 dl raudvin

3 dl kraft eller utspedd fond

Ein finhakka sjalottlauk

Fire-fem utsteina plommer, skorne i terningar

Salt og peppar

Smelt sukkeret i andefeittet i steikepanna som du steikte andebrysta i. Når det er blitt lysebrunt dreg du steikepanna til side og slår ned temperaturen på plata. Vent eit par minutt før du slår på vinen, og la den løyse opp sukkeret medan du rører godt slik at sukkeret har smelta heilt i vinen. Viss du er for kjapp med å slå på vinen og steikepanna er for varm, kan den nærast eksplodere, og sprute ned kjøkkenet. Ver sikker, eg har testa det ut.

Ha steikepanna på plata igjen, og slå på kraft. Ha i løken og plommene, og la det heile koke i ti-femten minutt. Smak på sausen, og tilsett salt og peppar til den er balansert og god. Ha sausen over i ei lita gryte, og køyr den glatt med stavmiksar. Smak til på nytt med salt og peppar viss det trengst.