Fisk, Italiensk mat, Mat
Kommenter innlegget

Bakt risotto


No på vinteren treng vi mettande og smakfull mat, iallfall viss vi har hatt ein utedag med leik og moro. Og kva skaper ein smakfull rett? For meg er det å bruke noko søtt, syrleg, noko salt og noko feitt. Fordelen med smakane er at dei også løfter fram smaken i råvarene vi brukar, og begge desse tilbehøra kan brukast til både kjøt, fisk eller vegetarrettar. 

Risotto er ein klassikar, du fresar løk og ris i smør, før du slår på kvitvin eller eplejuice eller litt vatn og kvitvinseddik, og så sper du i kraft til den er ferdig. Det er ekte vintermat, og kan varierast i det uendelege. Pass på at du har risottoris, altså det italienarane kallar arborioris i huset til ei kvar tid. Då kan du alltid lage middag på 20 minutt, det skal veldig lite ekstra til for at det blir snyta godt. Arboriorisen har mykje stivelse i seg, og det gjer at risottoen blir krema og mjuk, ikkje tørr og laus som vanleg basmati eller jasminris. 

I dag har eg laga den med vårløk og brokkoli, men du kan ha i erter, asparges, gulrot i terningar, paprika eller soyabønner, alt etter kva du har, og kva du skal servere det til. Og så er det viktig å alltid røre inn litt parmesan og litt smør eller olivenolje til slutt. Eg har til og med fått risotto med litt bruna smør på, det var utruleg godt. Så legg du til det du har av kjøt eller fisk, og så har du eit komplett måltid. Her har eg toppa det heile med ost, og så gratinert risottoen i omnen i eit kvarters tid. Det løftar heile middagen til nye høgder. 

I dag fann eg eit stykke varmrøykt laks i kjøleskapet, sikkert noko eg hadde ein plan for i jula, men som ikkje vart spist. Så då gjorde eg ein vri, og smuldra laksen før eg rørte den inn i risottoen, og så gratinerte eg det heile. Dette kan du også gjere om du har bacon i risottoen, då får du mykje smak for lite pengar og relativt lite kjøt. Ein fin måte å gjere middagen rimelegare på. Røykt makrell er sikkert også godt i denne bakte risottoen. 

Mange lar vere å lage risotto fordi dei ikkje orkar å koke kraft. Det er synd, for risotto vert godt også med buljong eller fond. Dessutan er det mange som heller heilt fin kraft i vasken! Kokar du gulrøtter eller erter i lettsalta vatn til middag? Kokevatnet er førsteklasses kraft. Hell den i eit litermål eller ei klar flaske, og sett den i kjøleskapet. Så brukar du den i risotto dagen etter. Suppler med buljong eller vatn (som enkelte kokkar kallar kommunalkraft) viss det ikkje er nok. 

Gratinert risotto med brokkoli og varmrøykt laks

2 ss smør

Ein sjalottløk

4 dl risottoris

1,5 dl kvitvin (kan byttast ut med eplejuice)

1 liter utblanda grønnsaks- eller kyllingbuljong

Eit stort brokkolihovud

To vårløkstilkar

(Det du måtte ha av andre grønsaker i frysaren eller i kjøleskapet)

50 g parmesanost, riven

150 g varmrøykt laks

Ost til gratinering

Sett steikeomnen på 220 grader. 

Finhakk løken. Smelt smøret i ei vid steikepanne, og ha i løk og ris. La det surre på middels varme til løken er blank og gjennomskinneleg, tre-fire minutt. Slå på kvitvinen, og la den koke heilt inn. Slå på kraft eller buljong litt og litt, og la det koke inn mellom kvar runde med væske. 

Del opp brokkolihovudet i små, små bukettar. Skjer bort viss det er flekkar på stilken, og kutt stilken i små terningar. Finsnitt vårløken.Når risottoen har kokt i ca. 10 minutt har du i brokkoliterningane. Når det er ca. 2 minutt igjen har du i brokkolibukettane, vårløken og den rivne parmesanen. Rør godt, og smak til med salt og peppar viss det trengst. Ha risottoen i ei eldfast form, og dryss på det du har av riven ost. Bak risottoen i ca. 20 minutt på 220 grader, til den er gyllen og fin. Server med ein salat. 

Legg att eit svar

Fill in your details below or click an icon to log in:

WordPress.com logo

Du kommenterer no med WordPress.com-kontoen din. Logg ut /  Endre )

Google photo

Du kommenterer no med Google-kontoen din. Logg ut /  Endre )

Twitter-bilde

Du kommenterer no med Twitter-kontoen din. Logg ut /  Endre )

Facebook-foto

Du kommenterer no med Facebook-kontoen din. Logg ut /  Endre )

Koplar til %s