Ribberull høyrer til på påleggsfatet til jul. Akkurat som fårerullen kan den krydrast på den klassiske måten, eller så kan du variere smaken. I dag får du forslag til ein klassisk variant, og ein middelhavsinspirert. Å lage fårerull er litt styrete, ein må som regel bestille frå slaktar, og det krev litt planlegging. Ribberull er langt enklare, du får ribbe overalt, og terskelen er langt lågare for å gå i gang. Pass berre på at du får ei ribbe der svora ikkje er snitta.

Ein ribberull kan også steikast i omnen, den må ikkje kokast. Då får du ein rull som liknar på den italienske porchettaen, og den passar perfekt med krydder av urter og kvitløk. Fenikkel er også eit klassisk middelhavskrydder. Brukar du nitrittsalt held ein slik rull seg ei veke eller to i kjøleskapet.

Vend rullen inn i ein rein kopphandduk og oppbevar den på eit fat. Skjer den tynt med skjeremaskin, og løsne nettet etter kvart som den vert eten av. Slike tynt skårne skiver av porchetta er perfekt nattmat fylt i rause rundstykke med ein god sennep eller aioli. 

Ribberull

2 kg tynnribbe

4 ts salt

1 ts peppar

Krydder (sjå forslag)

Bein ut ribba, viss ikkje slaktaren har gjort det. Skjer laus kjøtet frå svora så langt at svora du har igjen akkurat dekker yttersida av rullen, ca. 25 cm.  

Brett ribba ut i full lengde. Er ribba tjukk kan du snitte den ein gong til, og brette den ut endå ein gong. Då får du endå meir krydder og smak inn i rullen. Bland saman krydderet, og gni det inn i kjøtet. Dryss på saltet til slutt. Rull saman rullen til ein tett rull, slik at svorsida endar opp på utsida.

Bind rullen stramt med bomullstråd, og pakk den inn i eit heilt reint kjøkkenhandkle som du ikkje er spesielt glad i. Pass på at det ikkje luktar skyllemiddel. Surr rullen på nytt stramt ihop med bomullstråd. Alternativt kan du legge den i nett, som eg beskriv over.

Sett på ein kjele med vatn, og ha i 2 ss salt, nokre pepparkorn og to-tre laurbær. Legg rullen i når vatnet har kokt opp, og la den trekke på svak varme under lok i ca. 2 timar. Det skal ikkje fosskoke, berre såvidt syde.

Avkjøl rullen litt før du legg den i press. Har du ei presse, så er det berre å legge rullen i, og skru til. Har du ikkje, så legg rullen i ei brødform. Bruk ei fjøl eller liknande, som du surrar tett rundt forma eller legg noko tungt oppå, slik at rullen er under press. Du kan til og med berre surre den i plastfolie og så tett med teip, det er ingen formelle krav til korleis pressinga skal skje. La rullen stå kaldt og under press til neste dag.

Vil du bake ribberullen i omnen framfor å koke den, så surrar du den stramt, eller legg den i nett, og bakar den i ei langpanne i 2,5-3 timar på ca. 200 grader. Når den er ferdig let du den kolne før du legg den i kjøleskapet stramt innsurra i ein kopphandduk. Feittet som renn av ribberullen i omnen bør du ta vare på, sile og ha i ei skål. Når du har skore av rullen og skal legge den tilbake i kjøleskapet smører du først snittflata med litt av dette feittet. Det konserverer kjøtet. 

Julekrydder til ribberull

1/2 ts nellik

1/2 ts allehånde

1 ts ingefær

Italiensk krydring til ribberull

2 ts knuste fenikkelfrø

Fire kvitløksfedd, pressa

Skalet av ein lime

Rista svart peppar (varm korna i tørr steikepanne til dei poppar, avkjøl og mal)