Vi held oss til dei lokale matrettane, sjølv om overgangen ikkje er så stor frå Norge til Danmark.

I går sto det fisk på menyen, og fiskebutikken vi var innom onsdag hadde stort utval. Vi tok med oss heim eit fint stykke blåkveite (eller hellefisk som danskane kallar det), det må ha vore ein blåkveitebaby.

Fileten panerte eg på dansk vis, og serverte med remulade og rivne og kokte gulrøtter. (nokre vil ha det eine, og nokre vil ha det andre, et dei gulrøtter gjer eg gjerne ein ekstrainnsats.) Vi var åtte til bords, men 1,2 kg fisk vart nok.

Denne oppskrifta er ganske nøyaktig steg for steg. For dokke som er drevne på kjøkkenet blir nok dette for detaljert. Men panering av fisk skal også lærast ein gong, så denne oppskrifta er til ære for nybyrjarane blant lesarane, pluss dei som var til tannlegen den dagen dokke hadde om panering på skulekjøkkenet. Slik gjer du det:

Panert fisk

1,2 kg kvit fisk

3 egg

5 ss mjøl

1 ss urtesalt

1/2 ts kverna peppar

3 dl griljermjøl

Masse smør

Smelt smøret i ei romsleg steikepanne. Skjer filetane i passe serveringsstykke, og fjern eventuelle bein.

Ta fram tre halvdjupe tallerknar. Ha mjøl og urtesalt i den eine, som står lengst bort frå steikepanna. Ha tre egg i den neste, og pisk egga med ein gaffel. Ha griljermjøl i den tredje, som står nærast steikepanna.

Sett steikeomnen på 150 grader, og ta fram ei eldfast form. Smelt smøret i steikepanna, og sett plata på 2/3 av full kapasitet. Vend filetane først i mjøl, så i egg og så i griljermjøl. Steik dei i smøret til dei er pent brune på begge sider. Legg dei i den eldfaste forma etter kvart som dei er ferdige.

Sett forma i omnen og la dei kvile der medan du gjer alt det andre klart. Server med remulade og ein sitronbåt viss du har.