Fest, Mat, Middag, Sausar og dippar, Tilbehør
Comments 4

Shish kebab

 Sjølv om det ikkje er lenge sidan snødrevet sto om øyrene på oss er det freistande å byrje tenke på å ta fram grillen frå garasjen. Ut med gammalt kol, rista må i salmiakkvatn og skrubbast med stålbørste, og så er vi klare til ny grilldyst med nye oppskrifter.

Først må vi ta med nokre grunnprinsipp for grilling: Brukar du grillkol, så tenn grillen i god tid før maten skal lagast, minst ein halvtime før du skal byrje å grille. Legg kolet i ein haug på midten utan rista på når du tenner opp.

Når kola er blitt kvite av oske lønner det seg å legge hovudmengda av grillkolet på eine sida av grillen. Då kan du flytte maten bort frå den mest intense varmen når kjøtet står i fare for å bli svidd, og bruke meir indirekte varme. Ha alltid ei bøtte og ei spruteflaske med vatn i beredskap, og hald ungane unna.

Eg har fått meir og meir sansen for å grille lammekjøt. Det er mildt og godt på smak, og tek til seg krydder og sausar utan å misse karakter. I dag vil eg lære deg å lage kebab. Dei som har fere vide kjenner nok denne retten frå gatekjøken rundt om i verda. Kebab kjem i mange fasongar, og har det til felles at det er grilla kjøt på spyd. I dag skal vi bruke kjøtdeig av lam, som eg blandar halvt om halvt med oksekjøtdeig, mest av omsyn til dei sarte ganane. Gå til ein god slaktar, dei elskar å få slike utfordringar som å lage lammekjøtdeig til deg på kort varsel.

Denne måten å servere lammekjøt på er typisk nordafrikansk, og det vil du og sjå på kryddera eg brukar. Det er krydder som er vanleg å bruke i søt eller sterk mat, og i det nordafrikanske kjøkenet er det mykje meir vanleg enn hos oss å bruke same krydder i saltmat som i søtmat. Gå i ein butikk driven av våre nye landsmenn, så finn du nye og gamle krydder, i rimelege og spennande krydderboksar. Slik lagar du kebab til fire svoltne:

ventepolseShish kebab

300 g oksekjøtdeig

300 g lammedeig

1 ss potetmel

1 ts salt

1/2 ts malt kanel

1 ss paprikapulver

1 ts malt spisskummen

1/2 ts chilipulver

2 finhakka kvitløkskløfter

1 dl vatn

2 ss olje til pensling

4 stk. pitabrød

Ein halv løk

Blad av salat

Oliven etter smak

8 grillspyd. Brukar du trespyd, så legg dei i vatn ein halvtime før du brukar dei, så slepp du at dei tek fyr!

Rør kjøtdeigen smidig med saltet. Ha i mjøl og krydder, og bland godt. Hakk kvitløken fint og bland den i deigen. Rør inn vatnet til slutt, litt etter litt. Har du kjøt billeg kjøtdeig er det ikkje sikkert du treng alt vatnet, den inneheld vatn i seg sjølv i motsetning til kjøtdeig slaktaren lagar i butikken.

Gni hendene inn med litt matolje, ta i god klype deig i handa, og legg den rundt grillspydet som ei pølse. Pensle kvar kebab med olje, og legg dei på grillen. Snu dei ofte, slik at dei ikkje svir seg.  Å ta ei ventepølse i mellomtida er ikkje feigt, men tvert imot eit hyggeleg grillrituale. Sjekk ut pølseutvalet hos slaktaren når du likevel er der, min lokale slaktar lagar dei deiligaste ungarske paprikapølser og spanske chorizo-pølser som går dei vakumpakka i kjøledisken ein høg gong. Snør det? Kjøp deg ei grillpanne med striper i botnen, og lat som om det er sommar… 

Til kebab serverer eg den tradisjonelle yoghurtdressingen tzatziki. Den skal helst lagast av tyrkisk eller gresk yoghurt, den er tjukkare enn den norske. Alternativet er å la den norske renne av litt i eit kaffifilter før du blandar ingrediensane. Slik lagar du tzatziki;

kebab3 dl naturell yoghurt

1 slangeagurk

Hakka mynte eller dill

Salt og peppar

Ei klype sukker

Hell yoghurten i eit stort kaffifilter, sett det oppi ei trakt eller liknande og la yoghurten renne av slik at den vert tjukk. Viss du får tak i tyrkisk eller gresk yoghurt slepp du denne prosessen. Riv agurken på den grove sida av rivjernet. Legg agurken ut over ei skjerfjøl, og trykk eit dobbelt handklepapir mot det for å få ut væta. Still fjøla på skrå i oppvaskkummen slik at det våte renn av. Bland agurken oppi yoghurten, og smak til med salt, peppar og bittelitt sukker. Hakk urtene, og bland inn.

Eg har lært at tyrkarane brukar dill og grekarane brukar mynte, men det varierer sikkert frå kjøken til kjøken. Du får og tzatziki utan agurk, men eg syns agurken gir den litt tekstur og god smak. Lag gjerne tzatziki dagen i forvegen eller på føremiddagen. Den har berre godt av å stå litt.

Varm pitabrøda som snarast på grillen, opne dei og legg strimla løk, salatblad, tzatziki og alt anna du syns er godt inni. Til slutt kjem kebaben, og så kosar vi oss!

4 Comments

  1. Som du frister !!!
    Takk for mail forresten,)

    Og i dag har jeg vært i byen, innom tre forskjellige parfymerier men ingen hadde noen av de parfymene… Må ha bedre tid og sjekke ut flere skjønner jeg 😉

    Ha en vakker kveld !

  2. Tone says

    «Alternativet er å la den norske renne av litt i eit kaffifilter før du blandar ingrediensane.»

    Matyoghurt fra Tine fungerer helt fint også, uten å la den renne av 🙂
    Ellers pleier jeg å raspe agurken over et kjøkkenhåndkle, og så kryste ut vannet gjennom den..

    Jeg elsker å gå innom siden din, du skriver både godt og fristende.

  3. Du har heilt rett, Tone, Tine har komt med ein eigen matyoghurt som er perfekt til dette formålet. Så fint at du blir inspirert! 😀

Leave a Reply