Eg er glad i å bruke blåmuggost som krydder eller smakstilsetting i matrettar. Den har ein fin, feit, salt og fyldig smak.

I dag har eg brukt blåmuggosten i ei suppe med brokkoli som hovudingrediens. Denne suppa går fort å lage, og er mettande og god. Server den med kvitløksbrød eller rista brød med litt av den same osten som du har brukt i suppa.

Her har eg brukt klassisk roquefort, då blir den mogeleg å ete for dei som ikkje toler kumjølk så godt. Treng du ikkje ta slike omsyn kan du bruke alle typar blåmuggost, dei gode gamle norzola- og normanna-ostane kan også brukast i denne suppa.

Slik gjer du det:

Brokkolisuppe med roquefort

1 løk

2 store poteter

Ein bukett brokkoli, ca. 400 g

Olje til steiking

100 g roquefort eller annan blåmuggost

1 liter kraft eller kokande vatn med buljong/fond

Skrell og finhakk løken og poteten. Ha dei i ei gryte saman med oljen, og surr det nokre minutt. Slå på kraft, og la det koke til grønsakene er møre. Ha i grovhakka brokkoli, og la det koke 3-4 minutt til brokkolien er mør, men framleis grøn. Ha i blåmuggosten og køyr det heile glatt med ein stavmiksar.

Server suppa med smuldra blåmuggost i, og med brød til.