No er vi snart inne i ein stim med dugnadar, loppemarknader og kakebasarar. For min del inneber det baking av gode kaker som er lette å dele, og som attpåtil kan sjå så fine ut at dei let seg lodde ut utan skam. For i det frivillige kakebakingsfaget er det kaker av ulik klasse, må vite. Dei kakene som skal loddast ut skal vere fine, gjerne runde og forseggjorte i fin eske, eller på tilskoren papplate med cellofan og sløyfe. Til nød kan skuffekaker delast i fire og loddast ut, men då må dei vere av høg klasse, både når det gjeld smak og utsjånad. Får du ikkje tak i cellofan? Prøv i ein blomsterbutikk, eller kjøp ein pakke steikeposar. Dei store kalkunposane er perfekte til å pakke fine kaker i.

Dei som skal seljast i kakedisken kan gjerne vere vanlege sjokoladekaker og andre typar skuffekaker. Muffins og bollar er også etterspurde der, spesielt kanelbollar. Som den rutinerte loppemarknadkafevertinna eg er har eg alltid ei sikt med melis klar, eit dryss med den gjer dei tristaste bollar meir freistande. Brownies blir og finare med litt melis på seg. Det har alltid vore prestisje knytt til det å levere gode, fine kaker til slike bygdefestar. Her får du ei enkel og sikker oppskrift, som reddar familieæra i år og.

Eg innrømmer skamlaust at eg eitt par gonger har tydd til kakemiks i situasjonar der bakeplikta kom brått på. Den lyse langpannemiksen redda meg ein sein kveld då eg forsto for seint at eg skulle levere ei kake dagen etter klokka 10, og ikkje hadde verken sukker eller mjøl i huset. Naboen hadde ein pakke miks ståande som eg fekk låne, og dermed kunne eg levere ei saftig og god toscakake dagen etter. Bruk meierismør eller flytande Bremykt til slik kakebaking. Viss du brukar kakemiks må du ikkje finne på å bruke matolje slik dei seier på pakken, då får du ei smaklaus og trist kake, som smuldrar og ryr.

Men med ei god grunnoppskrift og alle ingrediensane i hus kjem du langt utan industriell hjelp og. Her er mi basiskakerøre, eg trur den stammar frå Ingrid Espelid Hovig. Huskar du kor frykteleg svolten ein vart når ho hadde sine matprogram ”i gamle dagar”? Vi skreiv oppskrifter så det spruta, og denne kakerøra har eg skrive inn i mi Malene-bok frå skulekjøkenet, så programmet må ha vore vist rundt 1980. Jammen byrjar ein bli gamal…

Eit lite hjartesukk må eg få kome med: Bli kjend med din eigen omn. Bruk alarmen på steikeomnen for å passe tida, og sjekk alltid med ei kakenål eller med ein tynn strikkepinne om kaka er ferdig når steiketida er utløpt. Sit det røre att på strikkepinnen må kaka steike litt lenger. Omnar er så ulike, og steiketida kan variere frå omn til omn. Eg har vore med på å skrape halvrå skuffekaker i søpla på 17. mai, og det er ikkje stas!

Grunnoppskrift til formkake

3 egg

3 dl sukker

1 dl rømme (eg har og med hell brukt kesam)

0,5 dl mjølk

4,5 dl kveitemjøl

2 ts bakepulver

125 g smelta smør

Visp egg og sukker til eggedosis. Bland i rømme/kesam og mjølk. Bland mjøl og bakepulver, og sikt det i medan du rører jamt og trutt. Ha i det smelta smøret til slutt. Denne porsjonen passar til ei rund form, ca. 24 cm, eller til ei avlang form, 1,5 eller 2 liter. Skal du bruke ei langpanne, så må du doble oppskrifta.

Eg likar å ta fram gamle klassikarar, i dag får du oppskrift på toscakake. Toscakake er ei nesten gløymd godkake som for nærare fem år sidan gjenoppsto her i Oslo under namnet Toska-kaka… Den sprø karamellglasuren er kjennemerket, og kaka er lett å få til. Den er fin nok til å dele i fire til utlodding slik eg har gjort, og i ei rund form eller i hjarteform er den flott å pakke i cellofan eller sette på festbordet. Slik gjer du det:

Tosca-kake (rund form)

1 porsjon basisrøre

Til glasur:

75 g sukker

75 g smør

75 g hakka mandlar

1 ss kveitemjøl

2 ss mjølk

Sett omnen på 180 grader. Lag ein porsjon basisrøre. Smelt 2 ss smør, og smør ei 24 cm form med dette. Ha 1 ss kveitemjøl eller semulegryn i forma, og vend den fram og tilbake slik at heile forma er dekt. Brukar du springform er det nok å smørje kantane, viss du har bakepapir i botnen. Ha i røra, og steik kaka på 180 grader i 30 minutt midt i omnen.

Medan kaka steiker første runde lagar du glasuren. Smelt smøret i ei gryte. Bland sukker, hakka mandlar og mjøl, og ha det oppi smøret. Ha i mjølka til slutt. La blandinga koke i 2-3 minutt medan du rører godt i botnen. Denne glasuren kan legge seg i grytebotnen viss du ikkje passar på. Når kaka har steikt i 30 minutt tek du den ut, og breier over glasuren. Steik kaka på nytt i 10 minutt, slik at glasuren vert pent brun. Siste runde kan du godt sette kaka ei rille høgare i omnen. Følg med så glasuren ikkje vert brend. Ta kaka ut, og la den kolne før du vender den ut av forma.

Brukar du langpanne vert kaka litt lågare sjølv om du doblar oppskrifta, men til gjengjeld kan du korte ned med 10 minutt på steiketida i første runde. Prøv med kakenål om den er ferdig.