Eg klarer ikkje alltid å variere seimiddagane våre. Vi har fast forsyning så ofte som vi vil frå Sunnmøre, så tilflyten er det ingenting å seie noko på. Men når eg lagar det til blir det fort til seibiff. Det er godt, men nye vriar er også velkomne.

I går lagde vi ei form med sei som vart veldig god. Eg var ute i hagen og fann noko som kanskje blir den siste persillen for i år, og så køyrde eg den i matmølle med heimelaga urtesalt og smør. Seien vart bakt med dette persillesmøret som topping, og med purre og kvitvin i forma. Slik gjorde eg det:

Persillebakt sei

700 g sei

4 ss meierismør

Eit knippe persille

1 ts urtesalt

Ein purre

1,dl kvitvin

Salt og peppar

Sett omnen på 200 grader. Skjer filetane i porsjonsstykke, og legg dei i forma. Ha på salt og peppar.

Klipp persillen oppi ein liten hakkebolle, og ha i smør og urtesaltet. Køyr dette glatt. Fordel persillesmøret over filetane.

Rens og kutt purren i tynne skiver, og fordel rundt og imellom filetane. Slå vinen over. Har du ikkje vin, kan du erstatte den med 1,5 dl vatn og 1 ss sitronsaft.

Bak filetane på 200 grader i 15 minutt. Server med kokt asparges og poteter. Syns du det blir for lite sjy kan du supplere med ein klatt rømme på tallerkenen. Serverer du den med kokt blomkål er den kanskje til og med lav-karbo? 😉