Billig mat, Fest, Gjærbakst, Mat, Pizza, Tilbehør
Kommenter innlegget

Perfekt til bufféen


Når gjestane kjem er det fint å kunne fylle ein lekker buffé med forskjellige rettar. Då finn alle noko dei likar, og ikkje minst kan ein prøve litt av kvart, og få smakt det meste.

I dag får du to oppskrifter av meg, som er perfekte til ein buffé. Og lagar du den eine har du langt på veg laga den andre! Superpraktisk, altså. Eg lagar små pizzaer med kvit topping, potet, asparges og bacon. Dei er så gode at det er vanskeleg å halde seg i skinnet. Til og med når dei er kalde er desse pizzabitane knallgode.

Det praktiske trikset er å lage dobbel deig, og så lagar eg ostepinnar av deigen som er igjen. Då får du to ulike rettar, med mykje mindre arbeid enn om du skulle byrja på nytt. Ostepinnane smakar perfekt til eit godt glas vin, og er fine å servere til ei suppe, eller som tilbehør til ein salat.

Begge delar er laga med ein klassisk gjærdeig. Eg brukar fersk gjær, eg syns den har meir sprut i seg, og deigen blir laus og fin. Berre la emna heve godt før du steiker dei, så får du saftig og smakfull bakst. Begge rettane bør steikast rett før gjestane kjem, men vil du spare tid kan du sette deigen kvelden før, og kaldheve den i kjøleskapet. Du kan også lage klar rømmetoppingen til pizzaen, og rive ost til ostepinnane i god tid. Eg lagar pizzaene av ein deigklump som er som ein kveitebolle, ca. 60-70 gram. Då får du ein pizza med litt under 20 cm diameter, og du kan dele kvar pizza i fire snippar.

Gjærdeig

5 dl lunka vatn (kaldt viss du skal kaldheve)

1 pakke gjær

1 ts salt

2 ts honning

12-13 dl kveitemjøl

Ha vatn, honning og salt i bakebollen, og smuldre i gjæra. Eg brukar kjøkkenmaskin, då får eg ein seig og fin deig som får elte lenge.

Elt inn mjølet litt og litt. Hald tilbake litt til kjevling. Elt til du får ein passe fast deig. Når du har elta inn det siste mjølet skal du akkurat kunne ta på den utan at den klistrar seg. Hev deigen i 30-40 minutt.

Når deigen har heva ferdig lar du kjøkkenmaskinen gå litt, slik at den vert ”slått ned”. Du vil ha ut mest mogeleg luft av den før du byrjar å jobbe med den.

_MG_4064Minipizza med potet, asparges og bacon

Ein halv porsjon deig

Rømmetopping:

2 dl creme fraiche

2 ts tørka urter, basilikum, timian og persille

½ ts salt

Ei klype peppar

1 ts honning

Fyll:

Ein potet

Ein løk

12 skiver bacon

Seks asparges

100 g riven ost

Sett steikeomnen på 240 grader utan varmluft.

Rør saman creme fraiche, urter, salt, peppar og honning i ei skål. Sett til side.

Ta halvparten av deigen ut av bakebollen, og dryss den og bakebordet med mjøl. Del deigen i 6-8 emne, så store som ein kveitebolle. Kjevle dei til små pizzabotnar. Pass heile tida på at dei ikkje set seg fast i benken.

Dryss eit tynt lag mjøl på eit steikebrett. Du kan bruke steikepapir, men mjøldryss gjer at du får den ekte steinovnssmaken.

Legg pizzaene på brettet, og smør ei raus skei rømmetopping på kvar av dei. Skjer poteten i tynne, tynne skiver, og legg dei over pizzaen. Dryss på litt salt. Legg på ein aspargesstengel som er snitta i to på langs, og båtar eller skiver av gul løk. Fordel osten på pizzaene, og legg baconet øverst.

Steik pizzaene på 240 grader midt i omnen i 12-14 minutt.

_MG_4069Ostepinnar

Ein halv porsjon deig

2 ts tørka urter

150 g riven ost

Eit egg til pensling

Sett omnen på 220 grader.

Ha 100 g ost og urtene i bakebollen saman med deigen som ligg att, og elt det godt saman. Ha deigen på godt mjølstrødd bakebord, og kjevle den til leiven er ca. 20×20 cm. Bruk eit pizzahjul eller ein skarp kniv, og skjer leiven i 2 cm breie strimlar.

Snurr kvar strimmel nokre gongar, og legg dei på eit bakepapir på bakebrettet. Pisk saman egget i ei skål, og pensle strimlane med egget. Dryss på det som er att av osten.

La ostepinnane heve i 20-30 minutt. Steik dei på 220 grader i 12-14 minutt, til dei er gylne og fine, og osten har smelta.

God helg!

Legg att eit svar

Fill in your details below or click an icon to log in:

WordPress.com logo

Du kommenterer no med WordPress.com-kontoen din. Logg ut / Endre )

Twitter-bilde

Du kommenterer no med Twitter-kontoen din. Logg ut / Endre )

Facebook-foto

Du kommenterer no med Facebook-kontoen din. Logg ut / Endre )

Google+ photo

Du kommenterer no med Google+-kontoen din. Logg ut / Endre )

Koplar til %s