Å, eg lengtar så etter sommaren! I hagen min står rabarbraen som blodraude knoppar, og alt eg vil er at den skal sprute opp, slik at eg kan lage mat med den.

Eg lengtar etter frukt og bær, bringebær i hagen og blåbær i skogen, og håper at det ikkje er så lenge til dei er her. Men i mellomtida må vi finne på noko anna, og sjølv om butikkbæra ikkje er like fantastiske som dei vi plukkar til sommaren, så er dei iallfall ei påminning om at det vert berre varmare og lysare no, dag for dag.

Difor gjekk eg i gang, og fann fram eit beger med blåbær som eg putta i ei deilig kake.  Har du frosne blåbær, så ha dei rett i røra frå frysaren, etter at du har skilt de ifrå kvarandre. Dette er ei klassisk formkake, og den kan lagast på to måtar. Du kan enten byrje med å piske smør og sukker lyst og luftig, og så piske inn egga eit og eit, eller du kan byrje med egg og sukker, og lage eggedosis som du vender mjøl og smelta smør inn i. Begge vegar fører til Rom, eller rettare sagt til ei lekker kake.

Byrjar du med å piske smør og sukker lyst så lagar du ein emulsjon, og kaka vert stabil, saftig og smakfull. Byrjar du med eggedosis får du ei lettare kake. Lagar du kaka med å røre smør og sukker kvitt, så pass på å piske godt mellom kvart egg, slik at du får ein jamn og fin «krem» som du vender mjølet inn i. Denne røra kan faktisk skilje seg, slik ein majones kan skilje seg, og då får du ikkje eit godt resultat. Bruk romtemperert smør, då er det lettast å få til ein god emulsjon.

Uansett korleis du handterer egg, smør og sukker så er hovudregelen at mjølet berre skal vendast inn. Her skal ikkje deigen piskast etter at mjølet har kome i, då vert kaka seig. Vi skal ikkje utnytte forklistringsevna i mjølet her, slik vi gjer når vi bakar gjærbakst. Her skal mjølet berre gi konsistens og stabilitet. Eg hevar kaka med bakepulver, og egga har også ei hevande effekt.

Dette er ei grunnoppskrift som du kan bruke til mange typer kaker. Den klassiske varianten er eplekake, men for meg er det først og fremst ei rabarbrakake, der eg vender rabarbraen i sukker og vanilje, før eg har den i deigen. Du kan ha i bjørnebær, bringebær, hakka sjokolade eller berre smake den til med vanilje. Då vert den det svenskane kallar «en sockerkaka», som passar perfekt til «fika», den vesle søtbiten som du får servert til ein kopp kaffe eller te tidleg på ettermiddagen i Sverige.

Bak denne kaka med ordentleg smør. Den blir så mykje betre på smak, og den får ei sprø og fin skorpe. Det er viktig å steike denne kaka nederst i omnen. Då får du ei fin skorpe heile vegen rundt, og den vert jamnt bakt heilt igjennom.

Blåbærkake med sitron

200 g mjukt smør (pluss litt ekstra til forma)

200 g sukker

3 egg

1 ts vaniljesukker

200 g mjøl

1 ts bakepulver

Skalet av ein sitron

Saft av ein halv sitron

1 dl mjølk

200-300 g blåbær

Semulegryn til strøing

3 dl melis og ekstra blåbær til pynt

Sett omnen på 180 grader. Smør ei form som rommar 1,5 liter, og dryss den med semulegryn. Vend gryna rundt i forma slik at dei dekker heile forma. Bank ut dei gryna som ikkje har festa seg i smøret.

Riv skalet av sitronen med det finaste rivjernet du har. Press safta av den eine halvdelen av sitronen.

Ha smør og sukker i ein bolle, og pisk det lyst og luftig. Ha i egga eitt og eitt, og pisk dei inn til deigen er glatt.

Bland det tørre i ei skål, og vend det inn i smørblandinga vekselsvis med mjølka. Vend inn blåbæra. Rør i sitronsaft og skal til slutt.

Hell røra i forma, og bak kaka i 40-45 minutt på nederste rille i omnen. Test om kaka er steikt ved å stikke inn ein spagettipinne. Viss den er tørr når den kjem ut, er kaka ferdig.

Ha melisen i ei skål, og rør den glatt med 1-2 ss sitronsaft og bittelitt vatn. Brei glasuren over kaka, og pynt den med litt ekstra blåbær.