På enkelte område er eg ei enkel sjel, eg seier mellom anna aldri nei til ein god kjøttpudding.

Dette er ein godt krydra variant, og i kjend Alt godt-stil har eg lurt grønsakene inn i puddingen, slik at ein dermed får i desse fine (ikkje fullt så) små meir grønsaker enn dei frivillig ville forsyne seg med. Slik gjorde eg det:

Spicy kjøttpudding med bakt paprika

4 paprikaer, gjerne av ulik farge

500 g medisterdeig

2 egg

1 dl mjølk

3 ss potetmjøl

300 g sopp

1 løk

1/2 purre

3  stilkar stangselleri

4 ss smør og/eller olje

1/2 ts malt svart peppar

1/2 ts cayennepeppar

1/2 ts malt muskat

2 ss soyasaus

Salt

Glasering:

1 ss ketchup

1 ss honning, flytande

Set omnen på 200 grader. Rens paprikaene, og del dei i båtar. Legg båtane av tre paprikaer i ei eldfast skål, og strø salt og peppar over. Ringle over olje, og bak paprikaene til dei er møre i omnen.

Ha medisterdeigen i ein kjøkkenmaskin. Har du Kenwood, så bruk K-spaden. Ha i 1 ts salt, og rør deigen seig. Ha i eit og eit egg, så har du i potetmjøl og mjølk. La maskinen gå litt, så deigen vert seig og fin. Set til side.

Varm opp olje og smør i ei steikepanne. Rens resten av grønsakene, og kutt dei og dei attverande paprikabitane i små bitar. Ha sopp og løk i steikepanna, og surr det til soppen har fått fin farge. Slå på soyasausen. Ha i resten av grønsakene med peppar, cayenne og muskat, og la det surre til alt er mørt. Ha i litt meir smør viss det trengst.

La grønsaksblandinga kolne, og rør den inn i medisterfarsen. Kle ei låg form med bakepapir, og ha farsen oppi. Stryk den utover med ein slikkepott. Rør saman honning og ketchup, og glaser puddingen med det. Bak puddingen i 30 minutt på 200 grader. Server med bakte paprika, potetmos og ein salat.