I ferien er det fint med lat mat, slikt som smakar godt, og er lett å lage.

For meg er reker sommarmat, men det treng ikkje vere dei små, ferske som ein får kjøpt på kaia. Eg  er like glad i grønlandsreker, dei er oftast store, saftige og ikkje minst fanga på ein berekraftig måte.

I dag lagde eg ganske enkelt ein couscoussalat med reker. Couscous er nordafrikanske grove semulegryn som har lite eigensmak. Difor er dei takknemmelege å bruke, det er lett å putte masse smak saman med dei og resultatet er alltid vellukka.

Det einaste du må huske på er å røre dei frå kvarandre med ein gong dei er ferdige. Let du dei stå og kose seg i gryta så sit dei som støypt saman, og så er moroa over. I salaten putta eg ein del grønsaker, og dei som eg ville ha møre la eg i kokevatnet til couscousen. På den måten vart grønsakene og gryna ferdige samtidig, og grønsakene fekk god smak av kokevatnet.  Slik gjorde eg det:

Couscoussalat med reker og avokado

400 g reker, ferdig rensa vekt

4 dl couscous

6 dl vatn

ein buljongterning eller 2 ss fond

2 ss sitronsaft

1 ss smør

150 g sukkererter

Ein raud paprika

Fire stilkar vårløk

To stilkar stangselleri

To avokadoar

Ein bunt dill

Vinaigrette:

1 dl kvitvinseddik

2 dl olivenolje

2 ts sennep, dijon

1 ts honning

2 ts tørka urter, basilikum eller timian

Salt og peppar

Lag vinaigretten først. Bland saman eddik, olje, honning, sennep og urter i eit romsleg, reint syltetøyglas, og rist godt. Smak til med salt og peppar. Set til side.

Kok opp vatn til couscous, og ha i buljong, sitronsaft og smør. Ha i paprika, løk, sukkererter og selleri, saman med couscous. Slå av plata med ein gong, og la det heile stå og trekke i fem minutt. Bruk ein halv ballongvisp eller ein stor gaffel, og rør forsiktig slik at gryna ikkje klumpar seg.

Skrell rekene, og la dei ligge og bade i vinaigretten i ca. ti minutt.

Rens avokadoen, og skjer avokadokjøtet i terningar. Legg opp salaten, og vend inn reker og avokado. Dryss på dill, og ringle dressingen over salaten.