Sommaren er ikkje sommar utan eit rikt utval salatmiddagar. Når barna mine får velge salat, så vel dei ofte Cæsarsalat. Cæsarsalaten kjem frå Mexico, der kokken Cæsar Cardini lagde denne salaten med ein enorm suksess.
Salaten er enkel, med salatblad, krutongar, parmesanost, kylling og ein karakteristisk dressing. Dressingen er av majonestypen, men tynnare, og skal etter tradisjonen smaksettast med ansjos. Det må du gjerne gjere, eg er ikkje så glad i ansjos, så her får du ei forenkla oppskrift utan.
Cæsarsalat kan også lagast vegetarisk, då kan du bytte ut kyllingen med tofu eller steikt halloumi. Då bør du også droppe worchestershiresausen, den er laga på ansjos.
Det er tre viktige triks for å få ein cæsar-salat til å smake heilt fantastisk:
- Det eine er å få til gode krutongar. Berre tørre brødterningar gjer ikkje nytta her, du må krydre dei, og ha på olje.
- Det andre trikset er å krydre kyllingen godt, og steike den så den får ei ordentleg skorpe.
- Det tredje trikset er å vende salaten i dressing, slik at alt bladverket tek til seg den gode smaken av Cæsardressingen. Cæsar Cardini hadde dette som eit slags show-nummer, ”tossing the salad” ved bordet. Er du i det artistiske hjørnet, så gjer alt ferdig på førehand, og lag ditt eige ”tossing”-nummer, det imponerer heilt sikkert gjestane dine.
Cæsarsalat
Krutongar:
Fire skiver grovbrød
3 ss olivenolje
1 ts urtesalt
Sett steikeomnen på 200 grader med varmluft.
Kutt brødet i terningar. Ha olivenolje og urtesalt i ein bolle, og bland det saman. Ha i terningane, og vend dei rundt. Legg bakepapir på ei steikeplate, og hell terningane utover papiret. La terningane steike i 7-8 minutt på 200 grader til dei er sprø og gylne.
Vinaigrette/Cæsardressing
2 dl olivenolje
1 dl god eddik
1/2 ts salt
1 ts honning
1 ts worchestershiresaus
Ei klype nykverna, svart peppar
2 ts majones
1 ss hakka vårløk
Pisk saman olivenolje, eddik, salt, peppar og honning. Smak om dressingen er passe salt, søt og syrleg. Pisk inn majones og hakka vårløk til slutt.
Cæsarsalat
Fire kyllingfiletar
Salt og peppar
Smør til steiking
To store hjartesalathovud
Ein avokado
Ein neve spirar av brokkoli
40 g skiva parmesan
Krutongar
Cæsardressing
Krydre kyllingfiletane godt med salt og peppar, og la dei gjerne ligge litt på ein tallerken før du steiker dei. I mellomtida kan du vaske, tørke og kutte opp salaten i passe store bitar.
Legg all salaten i ein vid bolle. Del avokadoen i to, og grav ut kjøtet med ei skei. Fordel det over salaten saman med brokkolispirane. Hell på halvparten av dressingen, og vend salaten rundt i den, til all salaten har fått dressing på seg. Ha resten av dressingen i ei skål, og sett til side.
Steik kyllingen i smør til den er gyllen og gjennomsteikt. La den kolne litt, før du skjer den i skiver på skrå. Fordel kyllingen over salaten, og dryss på krutongar og skiva parmesan. Kverne godt med svart peppar over. Server salaten med ekstra krutongar og dressing.