Eg fekk tak i ein heil kylling på benken her om dagen, og hagen er full av tomatar. Kva gjer ein då? Ser til Italia!

Kylling cacciatore er ein kylling laga i jegerstil. Du kan sikkert bruke denne oppskrifta på sjølvskote vilt, men eg syns den er god med kylling, og vil gjerne sleppe å skyte den sjølv. Eg har gjort det litt komplisert i dag, eg delte opp kyllingen i porsjonsstykke, og beina ut både bryst og lår. Det gjorde eg for å behalde det gode skinnet, det sit utruleg mykje smak der.

Kylling cacciatore kan lagast i ulike variantar, men eg likar å panere kyllingstykka. Dei får den deilige sprø skorpa oppå, og mjølet på undersida er med på å jamne sausen. Viss du syns det blir for mykje styr kan du lage dette med kyllinglår frå frysedisken og. Men bruk helst kyllingbitar med skinn, dei har mest smak.

Eg brukte sjampinjong i sausen, men har du vore ein tur i skogen og funne sopp, passar både steinsopp og kantarell perfekt til denne retten.

Som med all italiensk mat vert denne retten løfta av urter. Eg brukte timian og oregano, men du kan også ha i litt basilikum eller nokre nåler finhakka rosmarin. Kapers er også ein fin smaksgjevar, har du det ikkje kan du ha i litt ansjos eller litt oliven. Det er den salte umamismaken eg vil hente fram, den framhevar dei andre smakane, særleg når det får stå lenge i omnen.

Fordelen med å byrje med ein heil kylling er at du får det fine skroget til å koke kraft på. Når du har gjort det, kan du plukke kjøtrestane av det, så har du ein middag til. Suppler med ein pose lapskausgrønsaker, krafta og litt bønner, så har du ei deilig suppe.

Når du skal dele opp kyllingen kan du byrje med å skjere langsmed brystbeinet og ned slik at du får av bryststykka, med skinnet på. Så skjer du av låra inne ved overgangen til kroppen med ein skarp kniv. Kutt laus skinnet rundt beinet nede ved den spisse enden av kyllingklubba. Då er både kjøtet og skinnet laust frå beinet. Skjer eit snitt på innsida av låret, langsmed beinet. Jobb deg ned med kniven, slik at du får beinet av. Dette er litt styrete, men resultatet blir så mykje betre. Fjern beinet heilt, men også her skal skinnet sitte på.

No er du klar til å panere og steike kyllingen, og når det er gjort er det ikkje mykje meir arbeid før maten er klar, berre ein times tid i omnen. Eg serverte kyllingen med pasta, men du kan også bruke ovnsbakte poteter, søtpoteter eller ris. Dette er også veldig fin restemat, å finne litt kylling cacciatore i matboksen til lunsj er gull.

Kylling cacciatore

Ein heil kylling, 1-1,5 kg

1 dl kveitemjøl

2 ts salt

1 ts peppar

400 g fersk sopp

Ein stor, gul løk

To-tre fedd kvitløk

Olivenolje til steiking

Ein boks tomatar eller 6-8 ferske tomatar

To paprika, gjerne ulike fargar

1 ts timian

1 ts oregano

2 ss kapers

(1-2 dl oliven utan stein – om du vil)

Sett omnen på 210 grader.

Bein ut og gjer klar kyllingen. Tørk av kyllingstykka. Bland mjøl, salt og peppar i ei låg, vid skål. Vend kyllingbitane i mjølblandinga, og sett til side. Rens og del opp sopp, løk og paprika. Rens og finhakk kvitløken. Brukar du ferske tomatar, så skåld dei i kokande vatn, ta over i kaldt vatn, og skjer eit kryss i dei før du skreller dei. Fjern stilkfestet, og del dei i bitar.

Varm opp godt med olje i ei romsleg gryte. Legg kyllingbitane med skinnsida ned, og steik dei på ganske høg varme til dei er gylne på begge sider. Legg dei til side på ein tallerken.

Behold oljen i gryta, ta i meir om det trengst. Steik soppen gyllen i oljen. Ta i løk og kvitløk, og la det surre seg blankt i gryta. Slå på tomatane, og ha i kapers og paprika. La det surre litt medan du tek fram ei eldfast form. Ha tomatblandinga i forma, og legg kyllingbitane oppå med skinnsida opp. Bak det heile på 210 grader i ein time.

Server kyllingen med  kokt pasta, ovnssteikte potetbåtar eller berre med godt brød til. Ein enkel salat kan du også servere til.