Har du squash i hagen? Då veit du at du får squash slik du får ketsjup ut av ei gamaldags ketsjupflaske. Ingenting, ingenting, ingenting, og så plutseleg alt på ein gong.

Då er gode råd dyre, og eg får uendeleg mange søketreff på squash i bloggen min for tida. Alle som har squash i hagen treng oppskrifter for korleis ein brukar den.

Squash er jo velsigna på den måten at eigensmaken er ganske nøytral, så den tek villig til seg det du måtte ha å smaksette den med. Du kan rive den, og bake den inn i kaker, muffins eller brød. Du kan eddiksylte den, eller du kan bruke den som det finaste tilbehør, steikt i smør og krydra med urter.

I dag får squashen spele hovudrolla hos meg, og eg har fylt den med deilige sausar. Lukka er at soppen er i skogen samtidig som squashen er moden, og då er det å lage ein god fløtesoppstuing perfekt fyll. Eg har også laga ein variant med kylling, viss du har kjøtetarar du skal mette. Du kan også bruke svinekjøt i strimlar på same måte. Du kan også bruke ein bolognesesaus til å fylle squash med, det smakar fortreffeleg.

Eg har snakka om dette før, korleis ein best kan få til den gode smaken, med både søtt, salt, syrleg, sterkt og umami. Her står kjøt, sopp og buljong for det salte og umamismaken, men korleis få til sødme og syre? No har eg ei tilståing å kome med: Det er jammen ikkje alt eg lukkast med. I kjellaren har eg hatt ståande fire-fem glas med eplegelé. Den smakar nydeleg, men aldri om den nokonsinne blir til gelé på ordentleg. Framleis, etter eit år i kjellaren, er det meir eplesuppe enn eplegelé.

Men skam på den som gir seg, og kastar god mat. Denne eplesuppa har blitt min beste hjelpar på kjøkkenet, kanskje bortsett frå skarpe knivar og godt smør. Når ein saus, ei gryte eller ei suppe er kjedeleg, så slumpar eg oppi litt eplesuppe, og så er den runde, friske, gode smaken der.

Du treng ikkje lage mislykka eplegelé for å lage desse oppskriftene, men om du skulle lage mislykka eplegelé, så slå den for all del ikkje i vasken. Det same gjeld rognebær, rips og andre geléar du måtte ha, om dei er stive eller ikkje. Bruk dei i sausen! Har du ikkje ein gelé i hus, så kan du bruke sherry, kvitvin, vermouth eller eplejuice.

Uansett, fylt med desse deilige sausane vert fylt squash eit måltid du kan servere kven som helst, server dei med ein god salat til, og ha ei fin helg.

Fylt squash

½-1 squash per person

400 g kyllingkjøt i bitar

Salt og peppar

Ein stor løk

Innmaten av squashen

2 dl kremfløte

1 ss eplegelé eller 2 ss eplejuice/vin

Det du måtte ha av urter

1 dl riven ost

Smør til steiking

Sett omnen på 220 grader.

Skrell løken, og skjer den i båtar. Bruk ei skei eller eit melonkulejern, og få ut innmaten til squashen. Pass på at det ikkje går hol i skinnet. Ta vare på det du skrapar ut.

Smelt 1-2 ss smør i ei varm steikepanne. Ha kyllingen i steikepanna, og krydre med salt og peppar. Steik kyllingen til den har fått gyllen farge. Ta kyllingen til side, ikkje vask steikepanna. Ha i litt meir smør, og steik løk og squashinnhaldet til det har skifta farge til gyllent. Dryss på finhakka urter, salt og peppar. Ha kyllingen tilbake i steikepanna, og slå på fløte og eplegelé/juice. La det koke til det tjuknar. Smak til om sausen treng meir salt, peppar eller eplegelé/juice.

Legg squashane i ei eldfast form. Ha fyllet i uthulinga i squashane, og sett forma i omnen på 220 grader. La dei bake i ein halvtime. Ta dei ut, dryss på ost, og la det heile steike ti minutt til. Server med ein god salat, og eventuelt brød til.

Når du lagar soppfyll går du fram på same måte, men byttar ut kyllingen med det du måtte ha av sopp.

Skal du lage dette berre til deg sjølv, så kan du også skjere skiver av squashen, legge dei i ei eldfast form, legge på stuing og bake det i omnen. Ikkje tenk at det er smart å lage ein mindre porsjon av stuingen. Denne stuingen held seg i 4-5 dagar i ein boks i kjøleskapet. Og legg du den i frysaren i små posar eller boksar kan du fort og gale lage deg ein aldeles fortreffeleg middag når du måtte ha lyst på det.