Billig mat, Kaker, Mat, Noko søtt, Veggis
Comments 4

Er vi ferdige med rabarbra?


Nei, langt ifrå. Eg har iallfall masse igjen i hagen, og det er synd om den skulle kome vekk, altså stå så lenge at stilkane blir trevlete og seige, og smaken vert bitter og tørr. Difor får du to rabarbraoppskrifter til, på ei enkel og ei litt meir komplisert kake.

Eg har leita lenge etter den optimale rabarbrakaka.  Det finst mange variantar, med og utan paiskal, med og utan marengs og nokre blir berre tørre og triste.  Det er synd, for rabarbraen er ein fantastisk smaksgjevar, men den sterke syra gjer at det er ein balansegang å lage ei god rabarbrakake.

Her kjem oppskrift på to ulike, den eine er ein elegant pai med vaniljekrem og marengs, den andre kjem i kategorien ”lettvint”, med andre ord eggedosis og smelta smør, med frukta krydra og lagt rett i den mjuke og saftige kakerøra. Fest og kvardag, med andre ord, og det har ein jo bruk for! Eg tek den enkle først, så du ikkje misser motet:

Enkel rabarbrakake

175 g sukker

3 egg

175 g mjøl

175 g smør

1 ts bakepulver

400 g rabarbra i bitar

1 ts vaniljesukker

2 ss melis

1/2 ts kardemomme

Lag eggedosis av egg og sukker, smelt smøret.  Bland mjøl og bakepulver i eit litermål eller liknande.  Ha rabarbraen i ei skål, og rør inn vaniljesukker, kardemomme og 2 ss ekstra melis.  Rør inn smør og mjølblandinga vekselsvis i eggedosisen til du har ei jamn røre.

Ha røra i ei smurd springform, ca. 24 cm, der du har hatt bakepapir mellom ringen og botnen.  Strø rabarbraen over.  Dryss eit tynt lag sukker på toppen, det karamelliserer seg og gir kaka ein deilig “krunch” på toppen. Steik kaka på 180° i ca. 35-40 minutt.  Sjekk med ein spagettipinne eller ein strikkepinne om kaka er steikt igjennom før du tek den ut av omnen.

Vil du gjere denne også festfin, kan du lage marengslokk på som eg skriv om under, og så steike kaka 30 minutt utan marengs og 10 minutt med.

Festkake med rabarbra og marengs

Til mørdeigen:

115 g kaldt smør

100 g melis

225 g kveitemjøl

2 eggeplommer

2 ss kald mjølk eller vatn

Ha mjølet i matmølla, og skjer smøret i klattar og ha oppi.  Viss smøret ikkje er kaldt, vert dette blautt, og ikkje ein god deig.  Ha i melisen og eggeplommene, og køyr til alt har smula seg.  Ha i vatn eller mjølk, og køyr heilt kort, slik at alt samlar seg til ein klump om kniven.  La deigen ligge i kjøleskape i ein time for å bli fin for kjevling.

Under rabarbraen skal det vere vaniljekrem.

Vaniljekrem

3 eggeplommer (ta vare på eggekvitene til marengs)

3 dl kremfløte

1 1/2 ss potetmjøl

4 ss sukker

1 vaniljestang

Del vaniljestanga i to, og skrap ut dei svarte frøa.  Ha dei i fløyten, og kok han opp med vaniljestanga i også.  Pisk eggeplommene, hell den varme fløyten over og ha alt tilbake i kjelen.  Bland i potetmjølet, og pisk på svak varme til kremen tjuknar.  Avkjøl. (Du kan bruke kjøpevaniljekrem og, viss du har det travelt, eller føler at du er i ferd med å nå ditt bakeinkompetansenivå.)

Damp 400 g rabarbra med 100 g sukker i eit eldfast fat i ovnen på 200° i 20 minutt.  Ta av mesteparten av safta, og avkjøl.  Lag marengs ved å halvpiske tre eggekviter, og ha i 1 1/2 dl sukker litt etter litt.  Marengsen skal bli heilt stiv og blank.

Kjevl ut paideigen, og legg den ut i ei paiform på ca. 26-28 cm.  La deigen henge litt ut over kanten.  Deigen krympar, og du kan ta av det overskytande når botnen er forsteikt.  Prikk deigen med gaffel så han ikkje røyser seg, og steik han ved 200° i 15 minutt. Du kan gjerne ha i erter el.l. også for å  halde deigen nede.

Hell vaniljekremen i paiskalet, legg rabarbraen oppå, og brei marengsen over.  Er kantane på paien blitt litt brune, er det pent om du dekkjer dei forsiktig med marengs.  Steik paien i 10 minutt på 180° slik at marengsen stivnar og blir gylden og fin på toppen.

4 Comments

  1. Å, og så jeg som har masse rabarbra i fryseren etter fjor… spørsmål: kan den siste kaken lages dagen i forveien, eller er den av typen som helst bør serveres nystekt?

    Likar

  2. Den siste kan du lage ferdig til du har bakt paiskalet, dampa rabarbraen og laga vaniljekremen. Oppbevar paiskalet tørt og mørkt, og rabarbraen og vaniljekremen kvar for seg i kjøleskapet. Når du skal servere den, legg du det heile saman, lagar og har på marengs, og steiker den dei siste ti minutta. Det burde gå fint. Eg er redd paiskalet vil bli blautt om du oppbevarer heile paien ferdigsteikt frå dagen før.

    Likar

  3. Tilbakeping: Eit bloggememe « Alt godt

  4. Tilbakeping: Maikaker « Alt godt

Legg att eit svar

Fill in your details below or click an icon to log in:

WordPress.com logo

Du kommenterer no med WordPress.com-kontoen din. Logg ut / Endre )

Twitter-bilde

Du kommenterer no med Twitter-kontoen din. Logg ut / Endre )

Facebook-foto

Du kommenterer no med Facebook-kontoen din. Logg ut / Endre )

Google+ photo

Du kommenterer no med Google+-kontoen din. Logg ut / Endre )

Koplar til %s