Latest Posts

Vårt daglege brød

Published by

No er kvardagane her igjen, alle har komt heim frå ferie og matpakken må smørast som før.

Då er det viktig å ha eit godt brød å smøre matpakke av. Når eg skal lage matpakkar likar eg å ha skorpe rundt heile brødet, ganske enkelt fordi då held det seg nokolunde på plass. Det får eg når eg bakar brødet i former. Eg vaks opp med fire brød sett saman i ei langpanne, og når ein bakar seksten brød i slengen, som mor mi gjorde, så fungerer det greitt. Men eg held meg til tre om gongen, og då har eg tre former som passar perfekt inn i omnen min side om side.

Å lage brød er noko som passar fint å gjere ein dag då ein held på med andre ting i huset. Arbeidsprosessane er ikkje så store, men dei må gjerast med ca. ein times mellomrom, så ein har god tid til å fikse alt frå klesvask til loftsrydding medan brøda hevar. Eg brukar klokkealarmen på komfyren for å minne meg om når neste operasjon er. Viss ikkje gløymer eg kva eg eigentleg held på med, og så kjem eg tilbake til kjøkkenet etter eitt par timar, og møter ein brøddeig som er på veg ut døra.

Utfordringa er at brød held seg ikkje ferske  så lenge. Dei vert tørre og kjedelege altfor fort. Mitt tips viss du bakar tre brød er å dele dei i to, og fryse ned fem halve brød. Då kan du ta opp eit nytt halvt brød kvar kveld, og så har du ferskt brød til morgonen etter.

Men har ikkje du brødbakemaskin, tenker du kanskje. Jaudå, eg har det, og den vert brukt rett som det er. Men den fungerer ikkje så godt til matpakkebrød, for nysteikt brød om morgonen vert for ferskt til å skjere til brødskiver. Og om kvelden har eg ein tendens til å gløyme å sette den på, og så står vi der utan brød om morgonen. Så nokre brød i frysaren er gull å ha.

Oppskrifta mi er basert på ei mengd med mjøl og ei mengd med væte per brød. Då kan du lett gange den opp om du vil bake fleire, eller bake berre eitt om du vil det. Eg tek utgangspunkt i ein halv liter væte eller mauk til kvart brød. Bruk gjerne mjølkeprodukt som har gått ut på dato når du bakar brød. Det einaste eg styrer unna er mugg, elles går alt i brøda. Eg lagde nokre nydelege brød for ei stund sidan der eg hadde ein halv liter mangoyoghurt i deigvæska, rømme og kesam kan også brukast.

Fordelinga mellom grovt og fint mjøl er litt etter smak og behag. Grove brød er sunt, men små barn bør ikkje få for grovt brød. Dei vert for fort mette, og får ikkje i seg nok energi. Eg brukar som regel halvparten grovt og halvparten fint. Og for at det skal gå fort og radig så har eg ferdigblanda grovt mjøl i ein trelitersboks, og kveitemjøl i ein annan. Eg brukar å blande grovbakstmjøl med fin sammalt, men her kan du lage di eiga blanding som du syns er god. Eg likar og å ha frø i deigen, og her og har eg laga ei ferdig blanding med linfrø, solsikkefrø og sesamfrø, som gir god smak.

Ulikt mjøl har ulikt eige væteinnhald. Det gjer at det tek opp ulik mengde deigvæske. Difor er det lurt å halde attende litt kveitemjøl, slik at du kan justere kor fast deigen er på slutten av eltinga. Deigen må ikkje vere for fast, då vert brøda tunge og kjedelege.

Har du linfrø, solsikkefrø, sesamfrø eller liknande kan du godt ha i litt av det, det gir god smak, og litt å bite i. Eit par spiseskeier av kvar er passe, og mengda deigvæske treng ikkje endrast noko særleg.

Gjær må til, og sjølv om fersk gjær er det beste så brukar eg vel så ofte tørrgjær. Det tek litt lenger tid å heve ein deig på tørrgjær, men er du tolmodig så får du eit like godt resultat. Slik gjer eg det:

IMG_4732Grovbrød

50 g gjær eller 1 pakke tørrgjær

1,5 liter deigvæske

200 g kveitekli

250 g grov, sammalt rug

500 g grov sammalt kveite

ca. 1-1,2 kg kveitemjøl

1,5 ts salt

1 ss honning

Lunk væska, og løys opp gjæra og honningen i det.  Brukar du tørrgjær så bland gjæra i mjølet.

Ha væska i bakebollen saman med saltet, og elt inn alt det grove mjølet først, og så har du i kveitemjøl til deigen er passe fast. Det kan hende du treng litt meir eller litt mindre kveitemjøl, det kjem an på kvaliteten på mjølet. La deigen heve til dobbel storleik, ca. ein time.

Del deigen i tre og form brøda. Smør formene dine med matolje, og legg i eit og eit brød. Set omnen på 200 grader. La brøda etterheve i ein halvtime. Dusj dei med vatn, eller hell ein kopp vatn inn i steikeomnen, for å skape damp. Det gjer skorpa sprø og fin.  Steik brøda i 45-50 minutt til dei er ferdige. Når dei er gjennomsteikte har dei ein hol lyd viss du bankar på dei. Syns du dei er litt lyse i botnen når du tek dei ut av forma, så kan du godt gi dei fem minutt til utan form.

La brøda kolne på rist.

Kokebøker til halv pris hos Matbloggsentralen!

Published by

Matbloggsentralen er som du kanskje veit ei samanslutning av dei aller fleste matbloggarane i Norge. Der finn du utfordringar, Vekas bloggar og masse anna spennande.

No har Matbloggsentralen inngått ein avtale med Tanum bokhandel. Den avtalen inneber at eit knippe av bøkene som medlemmane av Matbloggsentralen gir ut er tilgjengelege til halv pris!

halvprisFor å få bruke dette tilbodet går du inn i Tanum sin nettbutikk. Så legg du dei bøkene du har lyst på som er skrivne av matbloggarar i handlekorga, og så brukar du rabattkoden MATBLOGG når du handlar. På denne måten kan du til dømes få tak i Smalhans og Sylting og safting heile året til halv pris! Tilbodet varer fram til 20. oktober, og er ope for alle.

Har du planar om å gi mine bøker i julegåve til nokon er dette den perfekte måten å gjere det på. Møtest vi IRL skal du til og med få signatur i viss du vil ha.

God kokebokshopping!

Live-sylting på Runde!

Published by

I morgon, laurdag 31. august, er eg klar for live-sylting på Runde Miljøsenter, i heimkommunen min Herøy!

IMG_0916_2Eg kjem på fly oppover, så eg har ikkje med meg så mykje bær. Difor må dei som kjem ta med seg det dei har lyst til å få sylta, og så lagar vi det vi det eg får inspirasjon til, og delar på alt.

Så er du i nærleiken, og har ei solbærbusk eller ei stikkelsbærbusk som du ikkje har plukka heilt rein (for ikkje å snakke om plommer!) så ta det med og så syltar vi i vilden sky.

Blir ikkje det bra? Eg gler meg iallfall veldig. Vi sjåast! 🙂

Urteaioli

Published by

Aioli er aldri feil, den passar som saus, på brødet og i ei god suppe. I dag proppa eg den med gode urter, det gir den endå rikare smak.

Urteaioli

2 eggeplommer (frys kvitene, eller lag marengs med dei)

2 fedd kvitløk

½ dl jomfruolivenolje

3 dl nøytral olje

1-2 ss sitronsaft

1 lita ts salt

½ ts honning

3 ss hakka, friske urter, basilikum, oregano, timian, toppløk

Press kvitløken, og bland alt som står over unntatt oljen saman i ein bolle. Bruk ein handmiksar, og miks ingrediensane over med nokre få dropar olivenolje.  Du kan byrje med ein god, kaldpressa jomfruolivenolje, ca. 1/2 dl.  Så tek du ein mildare olje, enten ein mild olivenolje eller ein annan smaksnøytral olje, til dømes raps eller soya, til saman 3 dl.

Drypp i oljen medan du miksar jamnt og trutt. Det viktige for å få eit godt resultat er å byrje å ha i oljen dropevis og så auke på litt etter litt til du har rørt inn all oljen.

Smak til med salt, litt sitronsaft, (syra balanserer feittet i oljen) og litt honning.  Husk at krystallar som salt løyser seg saktare i olje enn i vatn, så aiolien må kanskje stå litt mellom kvar tilsmaking for å trekke til seg saltsmaken. Er aiolien for fast i konsistensen, så kan du spe den med litt kaldt vatn.

Bland inn dei finhakka urtene til slutt.

Osterøre med granateplekjerner

Published by

Denne osterøra ser enkel og grei ut, men den er ein nydeleg smakseksplosjon! Ein av gjestane mine kommenterte at då ho las oppskriftene så syntest ho denne såg kjedeleg ut. Ho vart desto meir imponert då ho fekk smake den.

Røra kan også lagast som eit tiltygg til eit glas vin og litt brød i all enkelheit, den treng ikkje vere del av ein stor buffé.

IMG_4079Osterøre

200 g chevre utan skorpe

200 g philadelphiaost

1 dl mjølk

Ein liten bunt grasløk

Salt

Eit granateple

Rør saman ostane, og rør i mjølka litt til kremen har ein fin konsistens. Smak til med salt viss det trengst. Finhakk halvparten av grasløken, og bland det i ostekremen.

Del granateplet i to, og bank/kryst ut kjernene. La safta renne av, og legg dei avrente kjernene på eit kjøkkenpapir.

 Fordel osterøra på ein asjett, og dryss på grasløkstrå og granateplekjernene.  Sett fram godt brød, grønsakspinnar eller grissini som gjestane kan ta av røra med.

Laks med asparges- og vårløksrisotto

Published by

Risotto er ein av mine favorittrettar, og eg har laga mange ulike variantar. I dag har eg laga ein med asparges og vårløk. Til risottoen serverer eg smørsteikt laks, det er både godt og raskt å lage.

Til å lage denne retten brukte eg salmalaks, for det er enkelt og går fort. Men finn du fersk og fin heil fisk eller filetsider så bruk like gjerne det. Pass på å krydre fisken godt med salt og peppar, smaklaus fisk er kjedeleg.

Når du lagar dette er det smart å byrje med risottoen, for det tek lengst tid. Eg brukar soppmjøl, det er tørka traktkantarellar frå i fjor som eg har knust til mjøl. Har du ikkje det kan du i staden bruke ein eller annan soppvariant som du finn i butikken eller skogen, og smørsteike den saman med løk i risottoen. Denne risottoporsjonen er nok til fem-seks personar. Slik gjer du det:

IMG_4085Asparges- og vårløkrisotto

5 dl arborioris

15 dl kyllingbuljong

Ein liten løk

2 ss smør

1 dl kvitvin

Ein bunt asparges

to stilkar vårløk

2 ts soppmjøl

Riven pecorino eller parmesan

Finhakk løken. Smelt smøret ei låg, vid panne på middels høg varme. Ha i løken, og la den surre seg blank. Ha i risen og soppmjølet, slå på vinen og la den koke inn. Slå på litt og litt kraft, og la den koke inn mellom kvar skvett.

Snitt aspargesane på langs, og del i passe store bitar. Snitt vårløken skrått. Når risen er “al dente” (med ørlite tyggemotstand) har du i asparges og vårløk, og lar det dampe eitt par minutt til. Rør inn osten, og server med salmalaks.

Smørsteikt laks

150 g laks per person

Smør til steiking

Salt og peppar

Sitronsaft

Del fisken i porsjonsstykke, dryss på salt og peppar.

Smelt smøret i steikepanna, og legg i laksen når det har slutta å frese. Steik laksen i to minutt på kvar side. Den skal framleis vere litt saftig og mjuk i midten. Legg laksen på eit fat, og press over sitronsaft. Du kan også legge laksen rett oppå risottoen, slik eg gjorde det. Enkelt og greitt, og mindre oppvask!

Vi er tilbake!

Published by

Vi har hatt eit strålande vellukka bustadbyte i Barcelona, der vi budde i husværet til nokre rause, flotte menneske, som samtidig var hos oss.

Her ser du familien då vi tok ein liten tur til Andorra, eit fascinerande land. Eg kjem tilbake med meir om bytet og om kva vi gjorde i Barcelona, men no må eg pakke ut av kofferten. Ha ein fortsatt fin sommardag! 🙂

IMG_4372

Årets siste rabarbraoppskrift – eg lovar.

Published by

Ja, eg veit eg har vore inne i ein rabarbrastim. Men eg har tilgang til mykje rabarbra i hagen her, og dessutan er det så godt. Og ikkje minst, alle rabarbrakaker og dessertar kan stort sett lagast med andre frukttyper og. Så oppskriftene kjem til nytte året rundt.

Dagens dessert er ei deilig rabarbrakake. Mange seier at ein ikkje skal spise rabarbra etter jonsok, for den har for mykje oksalsyre. Men så lenge du er flink og et av rabarbraen din kan du trygt spise dei nye stilkane som veks opp.

I denne kaka brukte eg kremost med vanilje som er laga for baking. Den er ferdig søta, og smaksett med vanilje. Du kan også bruke ein vanleg naturell kremost, då bør du tilsette tre-fire spiseskeier sukker og litt vaniljesukker i ostekremen. Krydderet kan sløyfast, viss du vil ha ein meir nøytral smak på kaka. Slik lagar du den:

IMG_4130Rabarbrakake med ostekrem

150 g (ca. 2,5 dl) kveitemjøl

1,5 dl havregryn

1,5 dl brunt sukker

125 g smør

½ ts salt

1 ts kanel

1/2 ts kardemomme

250 g kremost med vanilje til baking

Eit egg

ca. 250 g rabarbra (Ca. tre store stilkar)

Ha mjøl, havregryn, sukker, smør, salt  og krydder i ei matmølle, og køyr det til ein grynete masse. Press massen saman om den vert for tørr. Del massen i to. Fyll halvparten i ei lita form, mi er kvadratisk, og ca. 20×20 cm.  Press massen saman til ein fast botn.

Pisk kremosten glatt med egget, og hell ostemassen oppå kakebotnen. Skjer rabarbraen i små bitar, og dryss dei over ostemassen. Smuldre resten av deigen over rabarbraen, og steik kaka på 200 grader i 30-35 minutt.

Server rabarbrakaka med ei kule is, eller med litt vaniljekesam.

Denne kaka kan også skjerast i ruter og takast med på tur i ein tett boks. Den er ein perfekt «energibar» til å innta på ein fjelltopp.

Appelsin- og rabarbracrumble med rømmekrem

Published by

Eg er alltid på leit etter gode rabarbraoppskrifter, og dette er ein vri som eg ikkje har prøvd før. Oppskrifta passar til ei lita paiform, og er nok dessert til ca. åtte personar.

Her var utgangspunktet for oppskrifta at eg hadde noko marsipan liggande som burde bli spist opp. Og kva gjer ein med marsipan midt på sommaren? Ein puttar den i ein rabarbrapai! Heilt logisk, ikkje sant? (Ja, og så låg det to appelsiner på fruktfatet og vansmekta.)

 IMG_4094Appelsin- og rabarbracrumble

300 g marsipan

100 g smør

3 dl havregryn

3 ss kveitemjøl

Riv marsipanen på rivjern.

Smuldre saman riven marsipan, kaldt smør, kveitemjøl og havregryn til ein smulete deig.

2 appelsiner

600 g rabarbra

2 dl sukker

½ ts kardemomme

Skrell appelsinen med kniv. Kutt den i bitar, fjern hinner og midten. Rens rabarbraen, og kutt den i bitar.

Bland saman alt til crumblen i ein bolle. Smuldre det saman til ein smulete deig.

Ha appelsin, rabarbra, sukker og kardemomme i ei gryte, og kok det i tre-fire minutt. La det kolne litt.

Ha rabarbrablandinga i paiforma. Smuldre crumble-deigen over. Bak paien i 25-30 minutt på 200 grader. Server med rømmekrem.

Rømmekrem

Eit beger rømme eller crème fraïche

4 ss melis

1 ts vaniljesukker

Litt sitronsaft

Rør saman alle ingrediensane i ein bolle. Smak til om det trengst meir av noko.

Coleslaw med eple og fenikkel

Published by

Coleslaw i alle variantar er vårt favorittilbehør no om sommaren. Det går kjempefort å lage, du kan ha ingrediensane i kjøleskapet, og dei held seg lenge. Klassisk impulstilbehør, altså.

Denne varianten vart til fordi vi hadde både nykål og raudkål i kjøleskapet, og jammen låg det ikkje ein litt slakk fenikkel innerst i grønsaksskuffen. Når eg då i tillegg hadde eit grønt eple i fruktskåla vart dette ein heldig og smakfull kombinasjon. Slik gjorde eg det:

IMG_4067Coleslaw

Ein skalk nykål

Ein skalk raudkål

Ein halv fenikkel

Eit halvt eple

1 ts dijonsennep

Litt sitronsaft

3 ss majones

3 ss kesam

2 ts honning

Salt og peppar

Snitt kålen fint, ostehøvel er fint å bruke. Riv fenikkel og eplet, eller bruk eit juliennejern og snitt dei fint. Legg alt lagvis i ein bolle, kryst litt sitronsaft over og dryss salt mellom laga. Dette kan du gjerne gjere nokre timar før servering.

Bland alt til dressingen, men vent med å salte. Bland saman dressing og snitta grønsaker, og rør godt. Smak til med peppar, og om nødvendig, litt salt. Server til grillmat eller anna steikt mat.

Squashsalat med nøttevinaigrette

Published by

Denne squashsalaten er ein annleis salat, der rå squash vert brukt som salatgrønsak, heilt tynt høvla i strimlar. Kombinasjonen mellom rå squash, fetaost og mynte er frisk og god. Med ruccola innblanda får du ein skarp smak som kompletterer det heile.

Eg har pynta salaten med fiolar, dei er spiselege, i tillegg til at dei gir ein annleis og artig farge i salaten.

Dressingen her er heilt fantastisk om eg skal seie det sjølv, den må du prøve til denne salaten eller din vanlege.

IMG_4088Squashsalat med mynte og feta

1 beger ruccola

1 squash

150 g fetaost

Ein neve frisk mynte

Fiolar til pynt

2 ss olivenolje

Salt og peppar

Fordel ruccolaen på eit vidt fat. Skjer squashen i tynne strimlar med ein potetskrellar, og fordel over ruccolaen.  Smuldre fetaosten over, og dryss på finhakka mynte. Ringle over olje, og dryss på flaksalt og nykverna peppar. Pynt salaten med fiolar rett før servering.

Vinaigrette med eple, valnøtter og fikeneddik

2 dl olivenolje

1 dl fikeneddik eller ein annan søt eddik

3 ss hakka valnøtter

Eit skrelt grønt eple, hakka smått

1/2 ts salt

1 krm peppar

Bland saman, og smak til. Fyll på ei flaske med vid hals, eller hell den i ei skål. Rør godt før folk forsyner seg, den vil skille seg sidan den ikkje er emulgert.

Hylleblomstmoro

Published by

No blomstrar hylla! Bruk sjansen, og lag ei deilig saft.

Det enklaste…

Published by

…Er ofte det beste. Hos meg får du ofte idéar til enkel mat, og denne veka er ikkje noko unntak.

I dag grilla vi kyllingbryst, enkelt og greitt. Kunsten er å ikkje bruke for høg varme, slik at maten vert svidd før den er gjennomsteikt. Kylling bør vere gjennomsteikt, for det kan vere skumle bakteriar i kylling som ein helst ikkje vil ha i seg. Vert gjestane utolmodige, så legg heller ein gjeng med pølser på grillen, slik at dei får seg det vi  i vår familie kallar ei ventepølse.

Til kyllingen serverer eg ein salat der eg kombinerer pasta og bakte grønsaker.  Den er mettande og smakfull, og det er lettvint å servere alt på eit fat. Tsatsiki er perfekt til, denne lette, syrlege sausen som smakar sommar for alle som har vore i Hellas. No finn du matyoghurt i dei fleste butikkar, viss du ikkje finn det kan du la vanleg naturell yoghurt henge i eit kaffefilter i ei trakt nokre timar, slik at mesteparten av væta renn av, eller du kan bruke kesam eller lett crème fraïche.

Begynn med grønsakene til pastasalaten, dei tek lengst tid. Lag tsatsikien medan dei bakar, og deleger grillinga til nokre andre. Slik gjorde eg det:

IMG_4056Pastasalat med bakte grønsaker

500 g fullkornspasta

2 pastinakkar

1 stor løk

1 aubergine

1 squash

2 raude paprikaer

200 g cherrytomatar

50 g  blanda, ferske urter, som oregano, persille, timian og basilikum

3 ss olivenolje

2 ts salt

Ekstra olivenoje, salt og peppar

2 ss kvit balsamicoeddik

Set omnen på 200 grader.

Bland urtene i ei matmølle med salt og olje til ein pasta. Sett til side.

Skrell pastinakkane og løken. Kutt pastinakkane i bitar så store som sukkerbitar. Kutt løken i båtar. Vend pastinakkbitane og løken i halvparten av krydderpastaen, ha i litt ekstra olje viss det vert tørt. Hell det heile i ei eldfast form, og bak det i omnen på 200 grader i 20 minutt.

Skjer auberginen i centimetertjukke skiver. Strø salt mellom laga, og stable skivene i eit tårn på ein asjett. Sett det til side.

Skjer squashen på langs, og så i centimetertjukke skiver. Del paprikaene i to, og fjern hinner, frø og stilk. Del dei i båtar.

Tørk aubergineskivene, og del dei i to. Vend aubergineskivene, squashskiene og paprikabåtane i resten av krydderpastaen, ha i litt ekstra olje viss det vert tørt. Ta ut forma, og hell aubergineskivene, squashskivene og paprikabåtane over pastinakken og løken. La det heile bake i 20 minutt til. Ta forma ut etter ti minutt, vend på grønsakene og legg på cherrytomatane før du bakar det heile ti minutt til.

Kok pastaen i godt salta vatn. La den renne av, og ha den i ein stor bolle. Ta ut dei bakte grønsakene, og vend dei saman med pastaen.  Bland godt, og hell alt over på eit stort serveringsfat. Ringle over balsamicoeddik og server.

Tsatsiki

1 beger matyoghurt eller lett crème fraïche

1 agurk

1 ts salt

to klyper svart peppar

2 ss finhakka mynte eller dill

1 fedd kvitløk utan det grøne

1 ts honning

Riv agurken på ei fjøl, og la den renne av. Når eg har det travelt brukar eg å legge den i kraftig kjøkkenpapir eller ein godt vaska kjøkkenhandduk, og klemme væta ut av den. Knus eller finhakk kvitløken. Bland saman yoghurt, kvitløk, urter og riven agurk, og smak til med honning, salt og peppar. La tsatsikien stå og trekke litt før du smakar til på nytt.

IMG_4060_2Grilla kyllingbryst

1-2 kyllingbryst per person

3 ss olivenolje

2 ts salt

½ ts peppar

Fyr opp grillen i god tid. Legg kyllingbrysta i ei form eller på eit fat. Ringle over olje, og dryss på salt og peppar. Grill kyllingbrysta medan du snur dei jamnt og trutt, til dei er gjennomsteikte. Server med pastasalat med bakte grønsaker og tsatsiki til.

Boligbytte i alle kanalar

Published by

For ei stund sidan var ein journalist frå NTB innom her heime og intervjua meg om det å bytte hus i feriane.

Reportasjen om dette fine feriefenomenet hamna i aviser landet rundt, her ser du til dømes reportasjen frå Dagsavisen. Sjå bort frå den underlege posituren min og haugen med småpengar på kjøkkenbenken.

IMG_2026Denne artikkelen i Dagsavisen har lege på pulten til ein i redaksjonen i God Morgen, Norge, og her om dagen ringte han meg, og lurte på om eg ville kome i programmet deira og snakke om feriane våre. Det gjer eg gjerne, og eg tek til og med meg Agnete, datra mi, som skal fortelje om korleis det er å bli teken med rundt i framande heimar for å feriere.

Vi kjem på tv i morgon tidleg (fredag) ca. 08:15, så er du vaken må du skru på, og sjå oss.

Bildet er naturleg nok frå Athen, der vi var i fjor sommar. I år går turen til Barcelona.

Medan vi ventar på sommaren

Published by

Sommaren ville liksom ikkje kome i år. I fjor blomstra rabarbraen min første mai. I år har eg ikkje hjerte til å spise av den til bursdagen min midt i mai. Urtene er heller ikkje komt opp ordentleg, eg går og ventar på ruccola og persille, men i bedet står framleis tulipanar, utruleg nok.

Så då får vi trøste oss med det som er til å stole på, det vi finn i butikken. I dag har eg laga enkel mat, dette går fort å lage som ein fin familiemiddag. Hovudretten er ein variant av den klassiske biff stroganoff. Det er tradisjonelt ein kjøtrett med oksekjøt som du steiker og kokar saman med løk og sopp. Sausen er basert på tomat og fløte, og blir kremete og deilig.

Desserten er superenkel, små marengsreir med rømmekrem og kirsebærkompott. Du kan lage kompotten sjølv av kirsebær eller morell frå frysaren, eller du kan gjere som meg, og bruke den du finn i butikken. Dette kan du lage med sviskekompott og, om du har ein slik pakke i skapet. Det spennande med desserten er møtet mellom den friske kompotten, den søte marengsen og den syrlege rømmekremen. Prøv den!

Vil du lage begge rettane, byrjar du med marengsen, for det tek lengst tid. Når eg lagar marengs brukar eg det finaste sukkeret eg får tak i, nemleg det engelske Tate & Lyle. Eg har sett andre produsentar og ha ”fint” sukker. Fint sukker er uovertruffent til sukkerbrød og marengs, men også til kaker der du skal røre smør og sukker kvitt. Å bruke fint sukker gjer at marengsmassen vert fortare ferdig, for du skal piske det til du ikkje lenger kjenner sukkerkrystallane når du smakar på massen. Slik gjer du det:

IMG_3584Marengsreir

2 eggekviter

1,5 dl fint sukker, om du finn

1 ts eddik, eg brukte kvit balsamico

½ ts salt

Sett omnen på 120 grader.

Skill egga, og ha eggekvitene i miksarbollen saman med eddik og salt. Pisk til eggekvitene har blitt til eit stivt og kvitt skum. Ha i sukkeret litt og litt. Pisk vidare til massen er glatt og kvit, og du ikkje lenger kjenner sukkerkrystallane når du smakar på massen.

Ha massen over i ein sprutepose med stor stjernetupp. Sprut massen ut i seks rundingar på eit bakepapir, og legg ein kant oppå ytterkanten av rundingane slik at det blir som eit reir. Marengs hevar seg ikkje nemneverdig, så dei kan stå ganske tett, og dei blir akkurat slik du lagar dei. Får du masse til overs kan du lage små pikekyss som du set innimellom reira på bakepapiret.

Dra bakepapiret over på eit brett (om du ikkje har det på brettet allereie), og bak/tørk marengsen i ein og ein halv time. La dei kolne på bakepapiret.

Rømmekrem

1 beger seterrømme

1 ss melis

1 krm kardemomme

Pisk rømmen stiv med melis og kardemomme. Sett kaldt fram til du skal legge opp desserten. Når du legg den opp legg du ei skei rømmekrem i vart reir, og så fyller du opp med kompott ved sidan av.

Medan marengsen står i omnen passar det perfekt å gå i gang med middagen. Denne gryta kan stå og godgjere seg på låg varme, så den toler godt å vente på gjestane.

Eit lite forbrukartriks skal du få av meg: Har du nesten tomme ketchupflasker? Dei prompar og sprutar, men lite kjem ut. Ta litt varmt vatn i dei, rist godt og sprut det oppi gryta som ein ekstra smak. Då har du tømt flaska, og kan kaste den med godt samvit. Slik lagar du kyllingstroganoff:

IMG_3578Kyllingstroganoff

700 g kyllingbryst

20 småløk

200 g sopp

1 dl søt chilisaus

2 ss tomatpuré

3 dl fløte

1 ts timian

Salt og peppar

Nokre greiner bladpersille

4 dl ris

Del kyllingbrysta i bitar. Forvell løken, og dra av skinnet. Rens soppen.  Eg brukar små soppar, og då brukar eg å la dei vere heile i gryta. Finn du berre store soppar må du kanskje dele dei i fire.

Brun kyllingen i smør på alle sider i ei låg, vid gryte. Krydre med salt og peppar. Ta dei ut av gryta.

Senk varmen. Steik løk og sopp i gryta. Legg i kyllingen. Ha i søt chilisaus, timian, tomatpuré og fløte, og la det putre under lok i 4-5 minutt.  Smak til med salt og peppar.

 Kok risen. Vend bladpersillen inn i risen rett før servering.

Dette er ein enkel og fin middag å invitere vennar til middag på, så plukk opp telefonen, og ring til nokre som det er lenge sidan du har snakka med. Ein vennemiddag er noko med det beste eg veit, og det er endå betre å bli invitert. Velbekomme!

Kaketips for 17. maifest

Published by

Høyrde du meg på radio i dag? Det var dette innlegget eg snakka om:

Torsk i ny drakt

Published by

Har du ein favorittfisk? Min favorittfisk er torsk. All fisk går fort å lage til, men torsken er så utruleg takknemmeleg både å krydre og å lage til at den kjem ofte på bordet heime hos oss. Og ikkje minst, alle, store og små, gjestar og fastbuande, et den med stor glede.

I dag har eg brukt loin, altså ryggstykke. Butikken eg handlar i pakkar loinen i eigen emballasje, du finn også torskeloin i vakuumpakning på same måten som du får salmalaks. Det er jo litt luksus, og du kan lage din eigen loin ved å kjøpe ein heil torsk og skjere den i ulike delar. Andre delar av fisken kan du bruke til fiskemat, fiskesuppe eller gryter.

Å lage denne middagen kan gå veldig fort viss du har førebudd deg litt. Særpreget ved retten er at torsken vert servert med ein saus basert på grilla paprika, og så serverer eg ein salat med aubergin og tomatrøre. Det som tek lengst tid er å grille paprikaen og å lage til auberginen.

Grilla paprika får ein utruleg deilig søt smak, og den vert mjuk som smør. Så den kjem ikkje til å syns i sausen, den kjem berre til å gje smak. Eg gjer det enkelt, og grillar den i steikeomnen. Skinnet er lett å fjerne viss den får stå og ”slå seg” litt etter at den er ferdig, då vert det lett å stikke ein finger inn under skinnet og skyve det av.

Rå aubergin er uspiseleg, den er bitter og kjedeleg på smak. For å kunne spise den må du først trekke ut bitterstoffa. Det gjer du enklast ved å skjere auberginen i skiver, salte dei og bygge dei i tårn slik at saltet trekker ut bitterstoffa. Når det renn godt av auberginstabelen kan du tørke bort det våte, og steike auberginskivene i steikepanna. Mange brukar å skylle auberginskivene, men eg likar at det er litt saltsmak igjen i skivene. Vi byrjar med å lage salaten:

IMG_3519Tomat- og auberginsalat

2 auberginar

3 bifftomatar

Ein vårløk

Ein bunt urter, eg brukte oregano

Salt og peppar

1 ts honning

Litt sitronsaft

Skjer auberginane i tynne skiver, tynnare enn til dømes til moussaka. Mine var ca. ein halv centimeter. Dryss salt på skivene, og legg dei i to stablar. La dei stå og safte seg i 15-2o minutt.

Hakk bifftomatane i små terningar. Finhakk vårløk og det du har av urter. La tomatane renne av  i eit såld i nokre minutt. Ha tomatane, vårløken og urtene i ein bolle, og smak til med salt, peppar og litt honning.

Steik auberginskivene i olje i varm steikepanne til dei har fått ein fin, gyllen farge på begge sider. Legg dei på eit fat etter kvart som dei vert ferdige. (Ikkje vask steikepanna!)

Legg tomatsalaten på auberginskivene, og press over litt sitronsaft. Sett til side.

 IMG_3523Torsk med paprikasaus

800 g torskerygg/-loin

2 raude paprika

1-2 dl vatn

Salt og peppar

1 pakke kremfløte

Smør til steiking

Del paprikaene i to på langs. Legg dei på bakepapir i ei eldfast form, og bak dei i omnen på 200 grader i 30 minutt. Dekk dei til, og sett dei til side.

Del torsken i serveringsstykke, og strø på salt og peppar.  Smelt smør i steikepanna som du allereie har steikt auberginane i, og steik torskestykka gylne. Dei treng ikkje vere gjennomsteikte. Legg dei i ei eldfast form og sett dei i den avslåtte steikeomnen, mest for å halde dei varme medan du lagar sausen.

Kok ut steikepanna med litt vatn. Bruk steikespaden og få med deg alt det gode som ligg i steikepanna etter at auberginane og fisken vart steikt i den.  Flå paprikaen, og legg filetane på ein asjett. Mos dei med ein gaffel.

Slå fløten i steikepanna, og la den koke litt med sjya. Ha i paprikamosen, og smak til med salt og peppar. Legg filetane i sausen, og server det heile med tomat- og auberginsalat og nypoteter kokt i godt salta vatn.

Ambassadøren og døra har åpnet sitt hjem…

Published by

Når ein har slike strålande flotte tenåringar, som er med på spennande og utviklande program for unge aspirerande leiarar, så opplever også foreldra fantastiske ting.

Leiarprogrammet Young ambassadors er eit opplegg for ungdommar som blir valt ut for å vere med på masse faglege og kulturelle aktivitetar gjennom eit heilt år. Dei går på seminar der dei blir presentert for ulike fag, ulike tema og ulike bransjar. Dei har mange kommersielle partnerar, og så har dei ei sterk tilknyting til den amerikanske ambassaden, og har mange arrangement der.

I dag vart «graduation» avholdt, og desse fine ungdommane fekk utdelt bevis på at dei har vore med, og ambassadør Barry White (som ikkje syng) og kona hans, Eleanor, tok imot ungdommane og foreldra deira for å markere at programmet er over. Mange dyktige ungdommar og stolte foreldre å helse på, god mat og vakre ambassadørboligen Villa Otium gjorde dette til ein uforgløymeleg kveld.

IMG_3573

Biff-wok

Published by

Dette er ein godt krydra, men ikkje alt for sterk biffwokrett. Eg er glad i krydra mat, men den treng ikkje vere sterk, altså full av chili og slikt. Denne varianten inneheld krydder som du kanskje mest assosierer med julebaksten, men det passar også fint til saltmat.

Du kan bruke alle typar oksekjøt i denne wok-retten, eg brukte strimlar av mørbrad. Grovare kjøt treng litt lenger koke-/steiketid, så tilpass tida til typen kjøt du har valt.

Eg serverer denne woken med eggnudlar. Det finn du i den asiatiske hylla i matbutikken, og det er lettvint å bruke. Koketida er som regel ikkje meir enn fire-fem minutt. Sjå om du finn fullkornsnudlar, dei gir litt meir fiber og mineral i kosten. Finn du ikkje eggnudlar så kan du koke ris til.

Og så må eg berre seie at du må ikkje la deg skræme av ingredienslista, som kan virke lang. Du har mykje av dette i kjøkkenskapet, det er eg sikker på. Sjekk blant julekryddera, og finn du ikkje det du treng der kan du leite i julepynten. Der har du kanskje både stjerneanis og kanel? Du kan også bytte ut kryddera med ei teskei eller to med fivespice, om du har det ståande. Slik gjer du det:

IMG_3494Krydra biff med nudlar

3 ss matolje

3 stjerneanis

1 kanelstang

6 kryddernellikar

4 kardemommefrøkapslar

400 g biffkjøt i strimlar

3 fedd kvitløk

1 stor løk

1 cm fersk ingefær, finriven

1 stor raud paprika

3 selleristilkar

1 vårløk

1 dl soyasaus

3 dl vatn

1 ts sukker

400 g fullkornsnudlar

Varm opp oljen i ein wok eller i ei vid gryte. Ha kryddera i oljen, og la det frese på ganske høg varme. Etter fire-fem minutt har du i kjøtet, og steiker det til det blir pent brunt på alle sider. Ta kjøtet ut av gryta, og ha det på ein tallerken.

Rens grønsakene, og kutt dei  i passe store bitar. Ha løk, kvitløk og ingefær i gryta, og fres det i den krydra oljen i nokre minutt. Ha i paprika og selleri, og steik to-tre minutt til. Slå på soyasaus og vatn, og ha i kjøtet. La det heile koke til væska har kokt inn litt.  Smak til med sukker, og eventuelt meir salt og litt peppar om nødvendig.

Kok nudlane i salta vatn. Vend vårløken inn i gryta, og set den til side. Hell nudlane på eit stort, oppvarma fat, og slå biffgryta over.

Eit matmysterium

Published by

Sjølv om påska er over så hender det at det oppstår mysterier rundt omkring.

Eg fekk eit på mail her om dagen, slik lyder det:

Hei,

Min svigerfar fra Sunnmøre har en søster som hadde fortalt at hun var blitt servert en tynn tynn kjeks som man nesten kunne se igjennom, hun mente den ble kalt blonde kjeks. Har prøvd å Google men får ikke opp noe. Det er visst en gammel Sunnmørs oppskrift. Min svigerfar har veldig lyst å smake disse kjeksene som det nå går gjetord om. Så da lurer jeg på om du vet hva dette kan være og om du har en oppskrift slik at jeg kan overraske min snille svigerfar? De var visst runde, stekt i jern??

Eg kjenner ikkje til dette, så eg må ty til mine kloke lesarar. Er det nokon som har høyrt om desse kakene/kjeksa?

Med godt skal vondt fordrivast!

Published by

Har influensaen teke deg? Då treng du noko varmande og godt å spise, som er lett å få i seg.

Det slår ikkje feil, sesongen for influensa, svineinfluensa og forkjøling renn inn over oss gjennom heile vinteren. Med eller utan vaksine så skal det noko til å stå imot desse smittebygene. Her i huset satsar vi på sengeleie, hostesaft og smaksrike supper. Noko av det viktigaste når ein ligg der i feber er nemleg å få i seg væske.

Enkelte svergar til løk. Dessverre er rykta om at avskoren løk syg til seg bakteriar og virus usanne, men løken er ei flott grønsak som passar perfekt i ei styrkande suppe. Dei naturlege partnerane til løk er kvitløk og stangselleri, eg fann ein rest av stangselleri bakerst i kjøleskapet som det faktisk framleis var liv i. Stangselleri bør ein alltid ha, det gir deilig smak og konsistens til supper og gryter.

Men hovudgjesten i dag er dei små kvite bønnene som kallast canellini-bønner. Dei får du i pakkar ferdig kokte og bløytte, men du kan også kjøpe dei tørka i sjaktlar. Det er meir økonomisk, men tek meir tid, dessverre. Storleiken lyg, dei skal både ligge i vatn og koke lenger enn andre bønner. Men når du først har teke deg tid til dette så smakar dei nydeleg, og gjer at denne suppa vert kremete og delikat, sjølv om den er heilt fri for mjølk, fløte og rømme.

Er du så heldig som eg er, at du har ein trykkokar, så går koketida fortare. Dei små kvite bønnene bør framleis bløytast over natta, men det held å koke dei i tjue minutt på full fres, så er dei møre. Trykkokar er smart til mange ting, du lagar nydeleg fårikål på 40 minutt viss du har ein slik.

Dei kvite bønnene får selskap av spinat, som er full av jern, folat og vitamin A, C og K, for å nemne noko i full fart. Denne kombinasjonen av kvite bønner og spinat finn du i mange variantar i Italia, og dagens suppe er sterkt italiensk-inspirert. Slik gjer du det:


IMG_2895Italiensk suppe med kvite bønner og spinat 

250 g kvite canellini-bønner, tørre

(eller to pakkar bløytte og kokte kvite bønner

2 ss olivenolje

1 gul løk

3 stilkar stangselleri

3 fedd kvitløk

1 liter vatn

2 ss grønsaksfond eller 2 terningar grønsaksbuljong

½ ts svart peppar, malt og salt

1 pakke spinat

Legg bønnene i bløyt i rikeleg med vatn over natta. Kok dei møre (det tek mellom ein og ein og ein halv time) i usalta vatn. Hell av kokevatnet, og sett dei til side.

Finhakk løk, kvitløk og stangselleri, og ha det i ei gryte med olivenolje. La det frese nokre minutt til det er mørt og blankt, og luktar fantastisk. Slå på vatn og fond, ha i peppar og la det koke nokre minutt til.  Ha i dei kvite bønnene, og la det koke 10 minutt. Ta unna eit par auser med bønner og grønsaker, og ha det i ein bolle. Køyr det som er att i gryta til ei glatt suppe med stavmiksar eller i blender. Skyll og tørk spinaten. Hakk spinaten grovt, og ha den i suppa. La det stå to-tre minutt på låg varme, det skal berre trekke.

Aus opp suppa i djupe skåler, og legg i ei skei med bønneblanding frå det du tok til side. Du kan rive litt parmesan over viss du vil, det gir ein deilig tilleggssmak. Server suppa med grilla brødskiver. Hell olje i ei grillpanne, og grill vanlege brødskiver nokre minutt på kvar side til dei er gylne og fine.

God bedring!

Eg treng hjelp! No i helga!

Published by

Og då er eg i Stjørdal, så ting må skje der oppe. Greia er at Gunda og Gunda lagar kokebok igjen. Denne gongen handlar det om ball! Alle sortar ball, raspeball, klubb, klot, risk og alt mogeleg anna som folk rundt om i verda lagar av potet, mjøl og salt.

Men Gunda og eg klarer ikkje å lage all denne ballen sjølve. Så dersom du er i Stjørdal eller omegn treng vi hjelp av deg. Oppgåva vi gir deg er å lage ei balloppskrift som du får frå oss. Så kan du kome og levere den hos Gunda enten torsdag, fredag eller laurdag, slik at vi kan fotografere din ball.

Vi er ikkje rike, men premien du får frå oss er ei gratis ballbok signert av oss begge Gundaene når den kjem frå trykkeriet. Vi treng ikkje store porsjonar, viss du fyller ei isboks er det nok til oss. Resten kan du servere til familien din.

Viss du syns dette er vel verd å bruke tida di på, så send meg ein e-post, så får du oppskrift frå meg. Og så sjåast vi i løpet av helga. På førehand tusen takk! 🙂

Smalhans på Mammut!

Published by

No er det mogeleg å gjere seg eit smalhans-kupp. I dag byrjar Mammut-salget, og der finn du Smalhans – boka mi om god mat for trange tider, til berre kr. 149,-! Så då er det tid for å skaffe seg eit eksemplar eller tre for å ha liggande som gåver og gleder.

smalhans_omslagDer er andre bra bøker og i år, eg vil særleg framheve Anne Spurkland si bok Frie kaker. Den er full av oppskrifter der ein brukar andre ingrediensar enn dei tradisjonelle, for å tilpasse maten til gluten-, egg- eller mjølkeallergikarar. Og omtrent alle andre allergiar og intoleransar du kan tenke deg.

Flying cirkus er også ei artig bok, det eg likar med den er at den gjer deg flinkare til å variere oppskrifter etter kva du har i kjøleskapet, framfor å slavisk følge ei opplisting frå topp til tå. Den lærer deg mykje om teknikkar og ingrediensar, og er eit nyttig hjelpemiddel på kjøkkenbenken.

Morten Schakenda si bakebok er også eit sikkert kort, mykje nyttig kunnskap om råvarer og teknikkar der og. For ikkje å snakke om Den store kakeboka til Sverre Sætre, der finn du alt du treng av kakeoppskrifter, heilt enkelt. Alle grunnoppskriftene er lista opp der, på beste vis.

I det heile tatt: Ta turen til ein bokhandel denne eller dei næraste vekene, og kos deg med det du finn! 🙂

Mine gode fastelavensbollar

Published by

Sjølv om det å faste er gått av moten så feirar vi framleis fastelavn.

Fastelavn er ein del av innleiinga til fasta, I morgon er det fastelavnssøndag, med ris som skal gi ein fruktbar vår. I gamle dagar fekk både kvinner og dyr ein omgang med riset, heldigvis har vi ris berre til pynt no for tida.

Mandag er det blåmandag, då skal ein ete mager kost, slik at ein har plass til mykje mat i magen dagen etter, på feitetysdag. Askeonsdag skal ein tradisjonelt kle seg i sekk og aske, og aska skal kome frå brende palmegreiner som ein har teke vare på frå palmesøndag i fjor. Det er mykje å passe på, altså.

Men ein kan også ta den enkle vegen, og ganske enkelt kose seg med deilige krembollar på fastelavn. Eg har laga kanelbollar av den same bolledeigen, det er fint med litt variasjon. Vert ikkje alle bollane etne egnar dei seg godt til frysing, så lenge dei ikkje har fått krem i seg. Slik gjer eg det:

IMG_2965Fastelavnsbollar

2-2,5 liter kveitemjøl

200 g smør

200 g sukker

1 pk gjær for søt gjærdeig

8 dl mjølk

2 egg

1 ts salt

2 ts kardemomme

1 ts bakepulver

Rosiner viss du vil

Krem og ekte vaniljesukker til servering

Ha mjølet, sukkeret, kardemommen og bakepulveret i ein stor bakebolle. Smuldre smøret i mjølblandinga til det er ein kornete masse.

Varm opp mjølka til den er fingervarm, og løys opp gjæra i den. Bland saman mjølkeblandinga og mjølblandinga, og elt godt. La deigen heve under klede.

Del opp deigen til passe emne, denne porsjonen gjev ca. 25 bollar. Form dei til runde, fine bollar som du legg på bakepapir på ei bakeplate. Pensle dei med samanvispa egg, og la dei heve godt (minst 40 minutt, er mi erfaring) før du steiker dei på 220 grader i ca. 15 minutt, alt etter korleis din omn er.

La bollane kolne. Pisk 3 dl kremfløyte til krem med 2 ts ekte vaniljesukker og 2 ts melis. Del bollane i to, legg krem på den nederste delen og legg toppen på.

Viss du er i det rampete hjørnet kan du også servere dei med litt syltetøy blanda inn i kremen. Dryss litt melis over til slutt.

IMG_2987Kanelbollar

Ein halv porsjon bolledeig

Kjevle bolledeigen ut til eit rektangel, omtrent så stort som steikeplata di. Det fine med denne bolledeigen er at den er så feit at du treng ikkje mjøl på benken viss du har ei glatt og fin plate.

Smør på mjukt meierismør, og dryss på rikeleg med sukker og kanel. Rull leiven saman frå den lengste langsida til ein tett og fin rull. Skjer rullen i skiver på ca. 1,5 cm. Eg brukar former til å legge skivene i, det gjer at det vert mindre reingjering. Du kan også sette bollane på bakepapir.

Pensle kanelbollane med samanpiska egg, det gjer at dei ser penare ut. Steik kanelbollane på 220 grader i 10-15 minutt. Du kan også lage melisglasur og smøre på, eller ganske enkelt drysse på litt melis frå ei tesil.

Server med store glas mjølk, eller ein god kopp te.

Appelsinostekake med mandelbotn

Published by

Denne kaka er ein rein nytelse, med den klassiske kombinasjonen av sjokolade og appelsin som eg og mange med meg er utruleg glade i. Men stort sett kjem kombinasjonen i ei sjokoladekake, i dag kjem den i ei ostekake.

Appelsinene er på sitt beste akkurat no, så då gjeld det å utnytte den gode smaken no på etterjulsvinteren. Då passar det som hand i hanske å lage denne gode ostekaka med appelsinsmak. Denne kaka er glutenfri.

IMG_2925Appelsinostekake med mandelbotn

Kakebotn:

5 eggekviter

½ ts salt

1 ts eddik

125 g sukker

1 ss potetmjøl

100 g mandlar

100 g kokesjokolade

IMG_2908Ostemasse:

400 g kremost

5 eggeplommer

1 dl kremfløte

125 g sukker

1 ss vaniljesukker

2 ts rive appelsinskal

Pynt:

20 g kokesjokolade

Halve valnøtter

Pisk eggehvitene stive med eddik og salt. Ha i sukkeret litt og litt. Pisk vidare til du har ein stiv og fin marengs. Hakk mandlane i ei matmølle. Dei skal vere ganske finhakka. Knekk sjokoladen i bitar, og hakk den og oppi same bolle. Bland inn ei skei potetmjøl og vend blandinga inn i marengsen.

Ha massen i ei smurt rund 26 cm kakeform. Eg brukte ei smurt paiform med litt høge kantar, men du kan også bruke ei bløtkakeform. I så fall bør du ha bakepapir i botnen. Dra mandelmassen utover i forma og opp langs kantane, slik at det blir plass til ostemassen etter at botnen er steikt.

Steik botnen midt i omnen ved 170°C i 25 min. Ta forma ut og sett den på rist.

Lag ostemassen medan botnen vert steikt: Ha alt i ein bolle og pisk til ein glatt krem. Hell ostemassen over kakebotnen i forma. Steik kaka vidare midt i omnen ved 170°C i 25 min til. La kaka kolne i forma.

Skjer rundt kanten viss du har brukt springform, og la den gli over på eit kakefat. Viss du har brukt ei paiform så pynt kaka i forma. Legg på halve valnøtter i mønster, og riv sjokolade over.

God helg!