Latest Posts

Ripsgelé til dessert

Published by

Det er ikkje berre ripsa som er moden i hagen min, bringebæra er også klar til å plukkast. I skogen fann vi blåbær, og då fann eg ut at å blande alt dette i ein gelé må bli ein deilig frisk og god dessert. Du kan sjølvsagt bruke ein ferdig gelépakke til dette, men eg syns det er artigare å eksperimentere med ulike smakar. Gelé er jo berre stivna saft, så du kan gi den akkurat den smaken du vil. Skal du servere berre til vaksne kan du lage ein deilig vingelé, det er alltid suksess. Rosévingelé med bær i er ein sikker vinnar

Men i dag hadde eg barn til bords, og då henta eg fram ei god ripssaft, og lagde gelé med den. Bland safta ganske sterk, det skal jo vere ein dessert. Eg syns det er pent å servere denne geléen i porsjonsglas, det ser så flott ut på bordet.

Når du jobbar med dette må glasa litt inn og ut av kjøleskapet for å sikre at ikkje alle bæra berre flotnar opp og legg seg på toppen av geléen. Difor er det praktisk å ha glasa ståande på eit brett, spesielt viss du lagar mange i slengen. Du kan gjerne la glasa stå i kjøleskapet før du byrjar å lage desserten, då stivnar geléen endå fortare, og det går raskare å bygge lag på lag med bær i geléen.


Ripsgelé med bær

5 dl sterk ripssaft (eg blanda 1:3)

6 plater gelatin

Blanda bær

Legg gelatinplatene i bløyt i kaldt vatn i ei vid skål.

Kok opp safta, og smak at ho er passe sterk. Dra gryta av plata. Klem bløytevatnet ut av gelatinen, og ha den i den varme safta. Rør godt til all gelatinen har løyst seg opp. Hell litt flytande gelé nederst i glaset, og ha i nokre få bær. Sett glasa tju minustt til ein halvtime i kjøleskapet, til geléen har blitt seig, og held dei første bæra fast. Legg på fleire bær, og hell på gelé slik at det akkurat dekker bæra. Sett kaldt i tjue minutt til, og fortsett til du har fylt opp glasa, og brukt opp bæra.

Server med vaniljesaus til.

Seinsommargleder – Italiensk brødsalat

Published by

Når ein har tilgang til gode råvarer er det berre å leike seg med maten. Eg er så heldig å ha tilgang til mange ulike typar tomatar, og det gjer at eg har fått smake på både gule, mørkebrune, gule, oransje og raude tomatar i alle storleikar og fasongar.

I dag har eg laga ein deilig italiensk salat med tomatar, bønner og brød. I Italia vil du finne denne på menyen som «panzanella». Den er veldig enkel, og nydeleg på ein varm seinsommardag. Italienarane er ekspertar på å utnytte det dei har i huset, til dømes gamalt brød, og tomatar. Denne salaten skal du lage når tomatane er veldig modne, like før dei vert blaute. Då er dei aller best, og har ein frisk, søtleg og aromatisk smak. Og så må du finne fram den beste olivenoljen din. Her er det ikkje så mange ingrediensar, så då må dei som er med vere ekstra gode.

Husk på å bruke oljen du har, den vert harsk viss den vert ståande på benken og vansmekte. Berre litt brød, olje og salt så kan du kose deg på ein alminneleg kvardag.

Brødet i denne salaten kan for så vidt vere kva som helst, men ikkje det aller grovaste. Det beste er å bruke eit saftig surdeigsbrød eller landbrød, som mange kallar det. I Italia vil ein som regel ha tørka brødet i staden for å steike det slik eg gjer, men steikinga gir endå betre smak, syns eg.  Men du kan også berre kutte brødet i terningar, og så spreie det utover eit steikebrett og la det ligge nokre timar før du puttar det i salaten. Byttar du ut honningen med eit anna søtstoff vert denne salaten også vegansk.


Italiensk salat med brød, tomat og bønner

800 g tomatar, gjerne ulike typer og storleikar

400 g bønner ”haricot vert”

400 g godt brød

To stilkar vårløk

1 ts honning

Olivenolje, salt og peppar

IMG_7491Skjer brødet i grove terningar. Varm opp nokre skeier olivenolje i steikepanna, og steik brødet fort på høg varme slik at det får farge på alle sider. Legg det på ein tallerken, og dryss på salt og peppar.

Rens bønnene, og gi dei eit raskt oppkok i godt salta vatn. Brukar du fryste bønner treng du ikkje gjere noko med dei anna enn å tine dei.

Ha litt olje, honning, salt og peppar i ein romsleg bolle og bland godt. Skjer tomatane i grove bitar, og vend dei i blandinga.

Bland tomatane, bønnene og brødet i ein serveringsbolle. Ha over det som er att i tomatbollen, og dryss på litt ekstra salt og peppar. Kutt opp vårløken i tynne ringar, og dryss over. Ringle over litt ekstra olivenolje til slutt. La gjerne salaten stå i romtemperatur ein halvtimes tid før servering.

Sylteboka i nytt opplag!

Published by

Samlaget har bestemt seg for å lage eit nytt opplag av sylteboka mi, og no er den ute i butikkane!

Det syns eg er veldig stas, spesielt no når NTB kan fastslå at sylting faktisk er trendy. Ikkje berre trendy, men supertrendy! Eg kjenner meg som ein pionér på sylteområdet, faktisk, som kom med boka mi i 2012.

Når ferien er over kjem Samlaget og eg tilbake med ein signeringsrunde, der du kan bestille boka hos Samlaget, få den signert av meg, og så tilsendt med fri porto. Boka kostar no 299,-. Blir ikkje det fint?

Heimelaga sylteagurkar

Published by

Eg har sylta små agurkar heilt sidan studietida på hybel. Vi budde nær ein fin grønsakshandlar som fekk inn det meste, og då var vegen kort til å lage desse fine agurkane. Akkurat no og ein månad framover er dei i sesong, så då er det berre å kaste seg rundt.

Dersom du ikkje finn små agurkar i butikken, så be butikksjefen ta det inn. Det er utruleg enkelt å lage sylteagurkar, og det er ei eiga godkjensle ved å servere dei heimelaga. Sylteagurkar passar til roastbeef, leverpostei og andre patéar.

2 kg agurkar

2 liter vatn

200 g salt

Kok opp vatnet med salt. La det kolne. Prikk skalet på agurkane med ein spiss gaffel slik at saltlaken lettare trenger inn og gjev smak, og legg dei i laken i ei gryte. Legg ein tallerken oppå, slik at agurkane er under vatn. La dette stå over natta.

Eddiklake:

6 dl 7% eddik

8 dl vatn

400 g sukker

4 ts salt

6-8 dillkroner

2 ss sennepsfrø

1 ss heil kvit pepar

Kok opp alt til laken unntatt dillkronene. Hell saltvatnet av agurkane. Skyl dillkronene. Ha agurkane på romslege, nykokte glas vekselsvis med dillkronene, og slå på laken. Skru på loket, og la agurkane stå kjølig nokre dagar før du byrjar å bruke av dei. Desse agurkane held seg i eit halvt år viss dei vert oppbeva
rt mørkt og kjølig.

Foto: Gunda Marie Næss

Den siste rababraen

Published by

I dag var eg ute og henta den siste rarbarbraen eg syns eg med godt samvit kan ete.

Det er alltid vemodig, det er eit teikn på at forsommaren definitivt er over, og vi går inn i høgsommaren, som er så alt for kort. Rabarbraen er rik på oksalsyre, eit stoff som gjer at det kan bygge seg opp nyrestein i kroppen, og det vil ein jo helst ikkje ha. Eg har hatt det, og det er ekstremt smertefullt. Det einaste artige ved det var at både eg og bror min vart lagt inn på sjukehus same dag. Begge bedyra vi at ingen andre i familien hadde nyrestein, der vi låg og ynka oss kvar for seg.

Oksalsyra aukar i mengde i rabarbraen etter kvart som sommaren vert varmare og vakrare, så etter jonsok sånn omtrent skal ein ikkje ete så mykje rabarbra. Så eg gjekk og henta inn det som var att på min. Det kokte eg eit aldeles deilig syltetøy av, som du også skal få oppskrifta på i dag.

Desserten i dag er ei superenkel kake, nemleg rullekake. Rullekake er eigentleg eit sukkerbrød som er bakt tynt utover på høg temperatur, og så kan du rulle det saman med det du har lyst på av fyll. Ein klassikar er syltetøy, men du får den også med vaniljekrem, romkrem eller med is. Sidan eg tilfeldigvis sto og sylta rabarbra samtidig som ideen om rullekake kom til meg så tenkte eg at eg kunne slå to fluer i ein smekk. Då vart rullekaka fylt med rabarbrasyltetøy og is samtidig! Ein uslåeleg kombinasjon.

Pass på at kaka får 4-5 timar i frysaren før servering, elles rekk ikkje alt å stivne slik at ein kan skjere pene skiver til gjestane.

Rabarbrasyltetøy med lime og vanilje

2 kg rabarbrastilkar

2 dl vatn

1 kg sukker

1 pk syltepulver

2 ts ekte vaniljesukker

Safta av ein halv lime

Ha rabarbra, vatn, lime og vanilje i gryta, og kok opp. La det koke til rabarbraen er mør og mjuk. Ha i sukker blanda med syltepulver, og la det heile koke friskt i 1-2 minutt. Hell syltetøyet på nykokte, heilt reine glas, og skru på lokket med ein gong.

OLYMPUS DIGITAL CAMERA

Rullekake med is og rabarbrasyltetøy

4 egg

180 g sukker

50 g kveitemjøl

75 g potetmjøl

1,5 ts bakepulver

1 liter vaniljeis, mjukna

4 dl rabarbrasyltetøy (eller anna syltetøy)

Sett steikeomnen på 250 grader.

Pisk stiv eggedosis av egg og sukker. Sikt saman mjøl, potetmjøl og bakepulver, og vend det inn i eggedosisen.

Legg bakepapir i ei langpanne, og fordel røra utover bakepapiret. Steik kaka på 250 grader i fem minutt. Legg eit nytt stykke bakepapir på bordet, og dryss på 2 ss sukker.

OLYMPUS DIGITAL CAMERA

Ta kaka ut, og løft kaka ut av forma ved at du tek tak i hjørna på bakepapiret. Legg kaka oppå det sukra bakepapiret. Legg langpanna oppå, og la kaka kolne. Dra forsiktig av bakepapiret. Viss det ikkje løsnar, så pensle det først litt med kaldt vatn før du prøver på nytt. Fordel syltetøyet oppå kaka. Legg isen med skei ca. 15 cm innpå kaka i ei stripe. Ta tak i bakepapiret som du strødde sukker på, og rull kaka over isen. Fortsett å rulle ved hjelp av bakepapiret til du har kaka i ein fast rull.

Legg kaka i frysaren i fire-fem timar. Vert kaka liggande lenger (det kan den godt), så pakk den inn i plast. Ta den ut av frysaren ca. 10 minutt før servering. Server den pynta med ferske bær eller litt ekstra syltetøy.

Bulghursalat med saltsylta sitronar

Published by

I dag har eg laga ein bulgursalat. Den er laga med bakte grønsaker, og ein ganske intens og smakfull krydring som gjer at dette vert eit tilbehør utanom det vanlege.

Ulempa er at du teknisk sett ikkje kan lage dette før om ein månad. Det er nemleg så lang tid det tek å lage saltsylta sitronar, som er ein viktig ingrediens i denne retten. Til gjengjeld har du saltsylta sitronar i årevis når du først lagar det, så eg kan ikkje anna enn å tilrå at du tek deg på tak og lagar eit stort glas fullt. Då har du ein aldeles magisk ingrediens i hus som løftar dei fleste middagsrettar til høgder du ikkje visste fantest.

Saltsylta sitronar er eit marokkansk fenomen. I Marokko er det standard tilbehør i ein klassisk tagine, denne gryta med geitekjøt og grønsaker som vert bakt i eit stort leirfat med pipe på som vert plassert på eit bål. Men eg brukar saltsylta sitronar i salatar, i dressingar, gryterettar og som her, i ein bulgursalat. Bortsett frå dei saltsylta sitronane er det persille, kvitløk og ingefær som gir smak til salaten. Her har eg brukt den søte, sylta ingefæren som du finn hos din lokale innvandrarbutikk, bruk den. Der finn du også mosa kvitløk på glas om du ikkje orkar å handtere kvitløken ved hjelp av naturmetoden.

Salaten er perfekt grilltilbehør, enten du grillar kjøt, fisk, gresk ost eller andre artige grillrettar.

Saltsylta sitronar

8-10 faste, fine sitronar

Grovt salt

Vask sitronane godt, og tørk dei. Skjer tuppane av sitronane, og del dei i båtar.

Legg eit lag salt nederst i eit romsleg glas. Press safta ut av sitronbåtane, og ha safta i saltet. Legg sitronskala oppå saltet. Fortsett lag på lag til du har brukt opp sitronane dine.

La glaset stå kaldt, snu på det av og til. Sitronane er ferdige etter ein månad.

OLYMPUS DIGITAL CAMERA

Bulgursalat med bakte grønsaker

200 g bulgur

4 dl vatn

1 ts timian

1 ts salt

1 bunt bladpersille

Ein sitron

Tre fedd kvitløk

2 ts finhakka sylta ingefær

2 ”båtar” saltsylta sitronar

1 ts salt

Ein fenikkel

Ein stor raud løk

Tre pastinakkar eller persillerøtter

2-3 dl olivenolje

Kok bulguren med vatn, timian og salt til den er mør, vanlegvis 8-10 minutt. Sett den til side.

Sett omnen på 220 grader. Rens persillen, og finhakk den. Fjern fruktkjøtet frå dei saltsylta sitronane, og finhakk skalet. Finhakk kvitløk og ingefær. Vask sitronen. Riv skalet av sitronen, og bland det med persille, saltsylta sitronskal, ingefær og kvitløk. Ha alt dette i ein stor bolle, og ha i oljen og saltet. Rør godt.

Rens løken og pastinakkane. Del løk, pastinakkar og fenikkel opp i passe store bitar. Vend grønsakene i persilleblandinga. Dekk ei eldfast form med bakepapir, og hell grønsakene oppi forma. Hell over det som er att i bollen av olje og krydder. Bak grønsakene i møre på 220 grader, i ca. 40-45 minutt.

Fordel bulguren på eit vidt fat. Ha dei omnsbakte grønsakene over, og hell over det som er att av olje og krydder i forma. Steik nokre gode pølser, og legg oppå grønsakene. Server det heile med ein god sennep.

OLYMPUS DIGITAL CAMERA

Stylterottemeny (hva rådyrene spiser hos meg)

Published by

Her er mi huskeliste for hagesentershopping. Då veit eg kva rådyra (AKA stylterottene) ikkje et. Takk, smgj!

Sommarveggis

Published by

Eg har som målsetting i sommar å spise litt grønare, litt mindre kjøt til kvart måltid, heilt enkelt.

Då må ein bruke fantasien, og finne nye måtar å sette saman eit måltid på, slik at det vert balansert og godt, samtidig som det mettar. I dag har eg laga burgerar eller lappar av squash og chevre, som eg serverer med bakte grønsaker, dobbeltbakte poteter og ein deilig coleslaw til. Finn du ikkje chevre i butikken så sjå etter den norskproduserte osten Haukeli. Du kan også bytte ut chevren med fetaost. Burgerane har eg henta inspirasjon frå Green Bonanza til, men laga min eigen vri på dei.

Du kan også servere burgerane med brød, men eg hadde kokte poteter liggande, og med litt blåmuggost på vart dei eit knallgodt tilbehør. Er du ikkje så glad i blåmuggost kan du godt bruke ein annan smaksrik ost. Eg har gjort dette med brie eller med rause mengder parmesan, begge delar vart knallgodt.

Coleslaw er ein amerikansk spesialitet som kjem i uendeleg mange variantar. I dag fann eg nykål i butikken, og den fekk vere med på festen. Nykål er tynn og lett i blada, og sjølv om den er god nykokt med smør og salt på så toler den godt å bli sett på bordet utan noko særleg varmebehandling. Finsnitta i ein god dressing passar den perfekt som grilltilbehør eller til mine saftige squashburgerar.

IMG_0115Squashburger

2 squash

1 dl finhakka urter, grasløk, estragon, timian

150 g chevre utan skorpe

2 egg

Ein gul løk

2 fedd kvitløk

1 ts sitronsaft

5 ss kveitemjøl

1 ts salt

¼ ts nykverna peppar

Sett steikeomnen på 200 grader.

Riv squashen grovt, eg brukte matmølla til dette. Legg eit reint kjøkkenhandkle (utan skyllemiddel!) i eit såld, og ha squashen over i handkleet. Dryss på litt salt, og la det stå litt og renne av.

Finhakk løk og kvitløk, og bland det med egga og osten i ein bolle. Press så mykje væte som mogeleg ut av squashen ved å forme handkleet til eit knyte, og vri rundt slik at væta kjem ut, men squashstrimlane er inni handkleet. Bland squashstrimlane i eggeblandinga, og smak til med sitronsaft, 1 ts salt og peppar. Rør inn kveitemjøl til det heile får ein passe konsistens.

Legg massen på eit bakepapir på eit bakebrett, og sett det inn i omnen på 200 grader. La det steike i 15 minutt, før du tek brettet ut og snur på kakene. La dei steike i 15 minutt til, gjerne med litt grillvarme på slutten. Følg godt med så dei ikkje blir brende.

Coleslaw

300 g kvitkål, eg brukte nykål som har tynne, fine blad

2 ts sitronsaft eller ein god lys eddik

3 ss majones

3 ss kesam

1 ts honning

2-3 ss finsnitta persille

Salt og peppar

Snitt kålen fint, ostehøvel er fint å bruke, eller ein sylskarp kniv. Legg kålen i ein bolle, kryst litt sitronsaft over og dryss salt på salt. Dette kan du gjerne gjere nokre timar før servering.

Bland alt til dressingen, men vent med å salte meir. Bland saman dressing og snitta kål, og rør godt. Smak til med peppar, og om nødvendig, litt salt.

IMG_0112Dobbeltbakte poteter

1-2 kokte/bakte poteter per person

3-4 ss smelta smør

60 g blåmuggost

Salt og peppar

Finn fram ei eldfast form og bakepapir, legg bakepapiret i forma. Legg potetene i forma, og hald rundt kvar potet medan du krasjar den med ei skei eller ein potetstappar. Har du ein slik kjøttdeighakkar kan du sikkert bruke den og. Pensle potetene med smør, og dryss på salt og peppar. La dei bake på 200 grader i 20 minutt. Ta dei ut, og legg på blåmuggost. La potetene får 10 minutt på 230 grader før servering, slik at dei vert brune og fine, og osten smeltar.

IMG_0113Bakte grønsaker

Ei eske (250 g) sjampinjong

5 små raudløkar

2 ss flytande bremykt

2 ss grillsaus frå flaske, eg brukte ein med kvitløk og honning

Bland saman bremykt og grillsaus i ein bolle. Vask soppane og fjern eventuell mold. Rens løkane, og del dei i båtar.

Ha sopp og løk i bollen, og vend dei rundt til dei er dekt av saus. Hell dei over i ei eldfast form, og la den stå nederst i omnen i 30-40 minutt til alt har blitt mørt og godt. Rist gjerne nokre pinjekjerner i salt til å drysse på.

IMG_0109

Sjokolademousse med jordbærtopping

Published by

Dette er ein luftig og smakfull sjokolademousse, som bør toppast med jordbær. Smaksmøtet mellom sjokolade og jordbær blir berre aldri feil. Desse bæra var rett nok frå Holland, dei norske har ikkje komt enno, så kald som juni har vore i år. Denne porsjonen er nok til fire porsjonsglas med sjokolademousse.

Det finst mange måtar å lage ein sjokolademousse på, denne er blant dei enklaste, trur eg. Du kan smaksette moussen på ulike måtar, med eit par skeier rom, litt appelsinmarmelade eller med litt espressokaffe så det blir ein mokkamousse. Bland i så fall smakstilsettinga i fløten når den har blitt varm.

Sjokolademousse

2 plater gelatin

1 dl kremfløte

150 g sjokolade, finhakka

2 egg

60 g sukker

Jordbærtopping:

200 g jordbær

2 ss sukker

Pisk eggedosis av to egg og sukker. Sett til side.

Legg gelatinen i bløyt i kaldt vatn. Ha fløten i ei gryte, og la den forsiktig koke opp. Ta gryta av plata. Kryst gelatinen fri for vatn, og ha den i fløten. Rør til den er oppløyst. Ha i sjokoladen, og rør til den og har smelta. Vend sjokolademassen inn i eggedosisen. Hell smeten opp i fire serveringsglas, og la moussen stå kaldt i 4-5 timar.

Rens jordbæra, og ha den i ein bolle. Ha på sukker, og rør godt til sukkeret har løyst seg opp. Legg jordbærblandinga oppå sjokolademoussen rett før servering.

IMG_0097

Pizza med sommar på

Published by

Eg sit her i svenskehuset og kosar meg medan det regnar noko voldsomt. Likevel har eg ikkje gitt opp sommaren. Eg trur den kjem snart, den er berre litt treg. I matbutikken ser eg det, og i hagen. For no kjem alle dei lekre sommargrønsakene, og asparges er ein av dei første.

Flytransporten gjer at vi kan få tak i asparges året rundt, men likevel er det noko heilt spesielt med dei første norske som smyg seg opp av jorda. For nokre år sidan var eg så smart at eg planta asparges i min eigen hage, og lukka er å gå ut og knekke seg av ein asparges og spise den akkurat slik som den er.

Når eg har samla opp litt asparges frå hagen har eg nok til eit måltid. Eg har ikkje så mange plantar, så det tek nokre dagar. Dei bør plukkast når dei er rundt 20-25 cm, vert dei mykje lenger vert dei treene og ikkje så gode. Skal du oppbevare asparges nokre dagar så er kunsten å hindre at dei held fram med å vekse. Det gjer dei nemleg viss dei har det for varmt. Er det kjøpeasparges fjernar eg strikkar og plast, og så kuttar eg dei nedst, berre ein centimeter. Så fuktar eg ein kjøkkenhandduk, og lindar den rundt stilkane på aspargesen. På denne måten held du dei fuktige og sprø, samtidig som dei ikkje blir gnagd på av innpåslitne gummistrekk.

Eg brukar ofte asparges på den aller enklaste måten, steikt i steikepanna saman med det dei skal vere tilbehør til, om det er ein biff, eit fiskestykke eller ein kyllingfilet. Men i dag har eg laga ein deilig, tynnbotna sprø italiensk pizza til å legge aspargesane på.

Mange skryt av at dei serverer ”steinovnbakt” pizza. Den enklaste måten å oppnå den steinovnsbakte smaken er å drysse mjøl på bakeplata du brukar i staden for å bruke olje eller bakepapir. Betre for miljøet er det og, bakepapir vert berre til silikonbelagt søppel. Bruk gjerne ein tesil eller ei liknande finmaska sikt for å få mjølet jamnt utover.

Pizzadeig:

5 dl lunka vatn

1 ts salt

2 ss olivenolje

2 ts tørrgjær

2 ts honning

Mjøl til passe deig

Ha alle ingrediensane unntatt mjølet i ein miksmaster eller annan type kjøkkenmaskin som eltar. Ha i mjølet litt og litt, og elt godt til du får ein smidig deig. La deigen heve i bakebollen, slå den gjerne saman nokre gongar, då vert botnen lett å jobbe med.

Sett omnen på 250 grader. Dryss eit tynt lag mjøl på steikeplata. Kjevle ut deigen, og legg den på steikeplata. Gjer klar fyllet.

IMG_0086Saus:

4 toppa ss creme fraîche

1 ts urtesalt

1 ts honning

Topping:

Ein halv bunt asparges

To vårløkar

Ein neve sukkererter

100 g chevre utan skorpe

Rør saman creme fraîche, urtesalt og honning. Stryk det ut over pizzabotnen. Snitt aspargesane i to på langs, snitt sukkererter og vårløkar pent på skrå. Fordel grønsakene over pizzaen. Dryss på smuldra chevre, og steik pizzaen på 250 grader i 8-10 minutt, til chevren har blitt gyllen og kantane har fått ein fin farge.

Glutenfri sjokoladekake

Published by

I dag har eg laga ei sjokoladekake med Rice Krispies. Den er både glutenfri og mjølkefri viss du brukar mjølkefri sjokolade, og droppar kremtopping. Til dei som toler mjølkeprotein men ikkje laktose kan du bruke laktosefri fløte.

Oppskrifta liknar på dei klassiske risbollane som ein får servert til jul, men den er ein million gangar betre med Rice krispies, og ikkje minst litt salt i sjokoladeblandinga. Mmmm!

IMG_6740Sjokoladekake med Rice Krispies

250 g delfiafeitt

200 g mørk sjokolade

¼ ts salt

1 egg

2 dl melis

1 l rice Krispies

Til pynt:

3 dl kremfløte

2 ts ekte vaniljesukker

2 bananar

100 g hakka nøtter, t.d. peanøtter

Smelt delfiafeittet på låg varme. Finhakk sjokoladen, og rør den i feittet. Sett til side så det får kolne litt.

Pisk eggedosis av egg, melis og salt. Vend sjokoladeblandinga inn i eggedosisen medan du rører godt. Vend inn rice krispies.

IMG_6734Legg eit bakepapir på ei steikeplate eller eit brett, og form sjokoladekaka slik du vil. Sett kaka kaldt til den stivnar. La den kome til romtemperatur før servering, elles vert den veldig hard å skjere i.

Pisk kremen stiv med vaniljesukker. Bre kremen oppå kaka, og legg på skiver av banan. Dryss på dei nøttene du vil ha på. Server med ein sterk kopp kaffe eller te.

 Eg lagde nokre porsjonsformer utan krem, til dei som ikkje toler mjølk. Du kan også bruke laktosefri kremfløte, viss vedkommande toler mjølkeprotein.

I tillegg skar eg nokre snippar som eg pynta med krem og bringebær. Her er det berre fantasien som set grensene.

IMG_6735

Pekanpai

Published by

Pekanpai er ein av mine kakefavorittar, og ein fin variasjon på kakebordet. Pekannøtter får du i innvandrarbutikkar, ofte har helsekostbutikkar det, og elles er det mogeleg for dei store kjedene å skaffe det viss dei får beskjed litt tid i førevegen.

Pekannøtter liknar på valnøtter, men har ein mildare og rundare smak. I denne paien blir dei nærast karamellisert, og blir knallgode. Å lage denne paien med valnøtter blir faktisk ikkje så godt, den intense valnøttsmaken vert litt overveldande.

Viss du vil kan du ta unna dei penaste og heilaste pekannøttene, og legge dei i mønster oppå paifyllet til pynt.

 IMG_6722Pekanpai

240 g mjøl

120 g smør

2 ts sukker

Eit egg

Set omnen på 180 grader. Ha mjølet i ei matmølle. Skjer det kalde smøret i terningar, og ha dei oppi mjølet. Ha i sukker, og køyr det heile til ein grynete masse. Knekk egget i ein kopp, og hell det i maskinen medan den går. La den gå til deigen samlar seg rundt kniven, det tek berre eit minutt. Stopp maskinen, og hell ut deigen. Kna den saman, og klem den ut i ein sirkel på storleik med ein asjett. Pakk den inn i plastfolie og la den ligge kaldt ein halvtime.

Finn fram ei paiform, og kjevle ut deigen slik at den dekker forma og heng utanfor. Dytt deigen godt inn i alle bølger og kantar på forma, og klipp den av litt utanfor kanten. Legg eit bakepapir oppå deigen. Legg noko tungt i forma oppå bakepapiret, eg brukar slike glassteinar som er laga for å ha i blomstervasar. Forsteik paiskalet i 20 minutt. Fjern det du brukte for å tynge skalet ned, og bakepapiret. No, medan paien er heilt varm, kan du skjere med ein skarp kniv for å få ein heilt rett kant langs forma. Bruk ein skarp kniv med sag, og jobb deg sakte og forsiktig rundt heile kaka.

Fyll:

75 g smør

2,5 dl brunt sukker av demeraratypen

2 dl lys sirup

5 dl hakka pekannøtter

2 ss rom (kan sløyfast)

2 ts ekte vaniljesukker

3 egg

Ha smør, sukker og sirup i ei tjukkbotna gryte, og la det koke i eit minutt medan du rører flittig. Ta det heile av plata, og rør inn nøtter, vaniljesukker og rom. La blandinga kolne nokre minutt. Pisk egga lett saman, og rør dei godt inn i nøtteblandinga. Hell fyllet oppi paiskalet.

Steik paien i 40-45 minutt til paien er ganske fast og fin. Pass på den undervegs, viss kanten vert for brun så kan du legge litt folie langs kanten for å skjerme den mot varmen.

La paien kolne i forma før du skjer i den. Server med ei kule god vaniljeis, eller piska krem. Paien kan gjerne bakast dagen før, og settast kaldt over natta. Ta den ut av kjøleskapet i god tid før den skal serverast.

Iskake med pistasjbotn

Published by

No står konfirmasjonane i kø, og kakeborda bugnar. Det frydar eit sunnmørshjarte å sjå eit vakkert og velfylt kakebord.

Men kva står det på desse kakeborda? Dei som bakar har sine spesialitetar, den eine har alltid med suksessterte, den andre kvæfjordkake, den tredje er ekspert på bløtkake. Men har nokon spurt konfirmanten? Kva har konfirmanten lyst på? Alle har sine favorittar, så pass på å ta ein prat med den konfirmanten du skal bake til, og spør kva han eller ho likar best.

Kakene eg kjem med oppskrift på dei næraste dagane er blitt til etter at eg har konferert med ungdommar i konfirmasjonsalderen rundt meg, og spurt kva deira favorittar er. Iskaka med pistasjbotn kom til fordi konfirmanten eigentleg berre ville ha is, han syntest ikkje det var så nøye med desse kakene. Og så lurte han på om det fantest appelsinis. Då komponerte eg denne kaka, og den fall i smak.

Ein bonus er at den er glutenfri. Har du mjølkeallergikarar i huset kan du bytte ut appelsinisen med ein god sorbet. Eg trur til dømes den ville smake fantastisk med ein kokossorbet på.

IMG_6742Iskake med pistasjbotn

4 eggekviter

150 g sukker

150 g pistasjnøtter, malte

1 ss maisennamjøl

1 ts bakepulver

Pisk eggekvitene stive med 2 ss sukker. Ha i resten av sukkeret litt etter litt, medan maskinen går. Sett opp farta, og pisk til marengsen vert stiv og blank.

Bland malte nøtter, maisenna og bakepulver saman, og vend blandinga inn i marengsen.

Legg botn i ei 24 cm rundform med laus botn. Klipp ein lang sirkel med bakepapir som du festar inni forma langs kanten. Hell i røra til botnen, og steik botnen midt i omnen på 180 grader i 35-40 minutt. Avkjøl botnen på rist utan å ta av forma.

Fyll:

4 eggeplommer

100 g sukker

6 dl fløte

½ plate kokesjokolade

3 dl appelsinjuice og skalet av ein appelsin

Vask appelsinen godt, og riv av berre det gule av skalet på eit fint rivjern. Press appelsinen. Får du ikkje 3 dl, så suppler med vanleg appelsinjuice. Kok appelsinjuicen inn til 1 dl. Pass godt på, det kan lett svi seg viss det kokar for mykje inn. Ha i skalet, og la det kolne.

Pisk eggeplommer og sukker til eggedosis. Pisk fløten stiv, og bland han inn i eggedosisen.

Hakk sjokoladen i små bitar. Vend det inn i fløtemassen saman med den innkokte appelsinjuicen.

Hell alt oppå den avkjølte kakebotnen. Dekk forma med plastfolie og sett i frysaren. Kaka kan takast ut etter 6-8 timar, men la den stå i kjøleskap i ein time før servering. Legg kaka på eit heilt flatt fat, det kan vere litt utfordrande å skjere den i stykke viss ikkje. Pynt med bær. Bruk ein skarp kniv, gjerne med sagtaggar, saman med kakespaden når du skjer opp kaka.

Denne kaka kan ein også jukse med. Den kjappe varianten er å lage botnen, og så la konfirmanten sin favorittis bli mjuk på kjøkkenbenken. Fyll ismassen i forma, og frys som over. Gjer du dette så treng du ikkje ta isen ut ein time før, kjøpeis er laga på ein slik måte at den ikkje treng å tine noko særleg før servering.

Kaka held seg i eit par veker i frysaren, så den kan lagast i god tid, og berre pyntast med bær rett før servering.

IMG_6743

Fynsk brunsviger

Published by

Eg må berre beklage at eg ikkje klarer å halde tritt og lese alle dei fantastiske matbloggane som finst. Men ved ei tilfeldigheit kom eg over denne, og eg må berre dele dette innlegget. Den uhøgtidelege og ærlege måten Maj-Britt Aagaard deler den fine og triste historia om far sin på rører meg veldig. Og eg er sikker på at den kaka er god og.

Inspirasjon frå Green Bonanza: Lasagne med spinat og tre ostar

Published by

Eg elskar det når eg finn nye, spennande bloggar, og ein av dei relativt ferske er Mia som skriv på bloggen Green Bonanza.

Sjølv om ho har blogga berre sidan juni 2014 så har bloggen verkeleg tatt av, og er i toppsjiktet blant dei ledande norske veggisbloggane. Det syns eg er gøy, det er så flott med folk som satsar på det dei elskar og gjennomfører det. Bloggen har ein heilt eigen estetikk som eg likar godt, og Mia tek veldig gode bilde.

I dag har eg laga ein av hennar lasagne-variantar, og eg vart freista av denne klassiske ostelasagnen med tre ostar og spinat. Den vart knallgod, gjestane mine berre akka og oia seg i fryd når måltidet var over. Mia kallar det ein Rolls Royce-lasagne, og det har ho heilt rett i.

IMG_6664Lasagne med tre ostar og spinat

Fyll:

400 gram fersk spinat

200 gram (1 boks) kremost

250 gram (2 stk) fersk mozarella

4 egg

En neve bladpersille

3 ss hakka ramsløk

1 ts salt

1 ts grovkverna peppar

12 lasagneplater

Saus:

3 sjalottløk

5 kvitløksfedd

3 ss smør

4 ss kveitemjøl

1 liter lettmjølk

1 ts salt

0,5 ts muskat

100 gram pecorino (delt i to)

Rens spinaten, viss du ikkje har ferdig rensa. Skyll den i tre vatn, og fjern dei tjukkaste stilkane og det som er stygt. Kok opp vatn og hell det over spinaten i ein bolle eller ei gryte. La det stå i fire-fem minutt. Hell av vatnet, skyll spinaten i kaldt vatn, og klem ut så mykje vatn som mogeleg. Eg brukte eit reint klede til det. Finhakk spinaten, og ha den i ein bolle.

Bland ricotta, mozarella skoren i små terningar, persille og salt og peppar oppi spinaten. Her putta eg i eit par nevar ramsløk, berre for at eg hadde det. Knekk egga, og rør dei saman med ein gaffel før du heller dei oppi spinat- og osteblandinga. Sett til side.

Finhakk sjalottløken. Smelt smøret i ei tjukkbotna gryte, og ha i løken. La det surre medan du finhakkar kvitløksfedda, og ha dei oppi når løken har fått litt farge. La det surre eit lite minutt før du rører inn kveitemjølet. La mjøl- og smørblandinga boble litt utan å bli brunt på medium varme før du slår på mjølka. Spe i mjølka litt og litt til sausen tjuknar. Ha i muskat og halvparten av den faste osten. Her brukar Mia parmesan, men eg hadde pecorino, som gjer same nytta. Eg droppa salvien, fordi eg ikkje hadde det tilgjengeleg.

Ikkje bruk ei altfor stor form, dette er ikkje ei veldig stor oppskrift. Legg kvitsaus i botnen, så lasagneplater, og så fyll. Fortsett å legge lag på lag til du har brukt opp både fyll og saus. Det øverste laget er siste rest av sausen og resten av den harde osten som du dryssar på.

Steik lasagnen på 200 grader midt i omnen, i ca. ein halvtime. La den stå nokre minutt før du delar den i porsjonar. Server lasagnen med godt brød, og gjerne med ein salat med litt syrleg dressing.

Guinness-sjokoladekake

Published by

Denne kakeoppskrifta har gått som ei farsott i min venninnegjeng. Det byrja med at ei venninne fann den i ein amerikansk matblogg, og lagde den til mannen sin på farsdagen. Den gjorde stor, stor lykke, og sidan då har den halde fram med å gjere suksess.

Enkelte mistruiske seier at det er berre namnet, men det er det altså ikkje. Det er ein aldeles fantastisk god, ganske vaksen smak på sjølve kaka, kombinert med ein salt karamellglasur som er noko av det beste eg har smakt. Den kan for øvrig lagast for seg sjølv, og brukast til dømes som topping på is.

Får du ikkje tak i Guinness, så lag den med andre typar øl. Det er den bitre tonen vi er ute etter, den finst også i andre øltypar. Denne oppskrifta er med norske (metriske) mål, det gjer den litt enklare å lage enn når ein må rekne om frå litt underlege amerikanske mål, som ein som regel finn når ein søker opp denne oppskrifta. Kaka kan også lagast i miniformer, til dømes til ein buffé eller eit pent selskap.

IMG_2309Guinness-sjokoladekake med salt karamellsaus

2,5 dl Guinness

250 g smør

2 dl (90 g) kakao

5 dl (350 g) mjøl

5 dl (450 g) sukker

2 ts bakepulver

1 ts vaniljesukker av den ekte typen

1/2 ts salt

3 egg

2 dl rømme

Set omnen på 180 grader.

Smør forma du vil bruke, typisk ei såkalla randform, altså ei kakeform med hol i midten. Dryss forma med mjøl eller semulegryn, og bank godt ut av den i vasken slik at det ikkje dannar seg klumpar med mjøl/gryn.

Ha smør og øl i ei gryte, og la det koke opp. Pisk inn kakaopulveret til blandinga er glatt. Sett det til side.

Bland saman mjøl, sukker, bakepulver, vaniljesukker og salt i ein bolle.

Bruk ein miksmaster, og pisk saman rømmen og egga i ein romsleg bolle. Alt skal samlast i denne bollen. Rør smørblandinga inn i egg/rømmeblandinga. Vend til slutt inn mjølblandinga, ikkje rør for mykje. Røra skal ikkje bli seig, berre akkurat blandast slik at det ikkje blir mjølklumpar. Eg brukar ofte ein halv ballongvisp i denne operasjonen.

Hell røra i forma, og steik kaka midt i omnen på 180 grader i 55-60 minutt. Sjekk med ein spagettipinne når det har gått 55 minutt, sit det ikkje røre fast på pinnen er kaka ferdig, viss det er røre på den treng den fem minutt til.

La kaka kolne i forma, la den stå minst ein time, før du vender den på eit fat. Den er uansett for varm til å helle glasur over når den kjem rett ut av omnen.

Salt karamellsaus

5 ss smør

1,2 dl brunt sukker

1 dl fløte

Ei klype salt

1/2 ts ekte vaniljesukker

2 dl melis

Ha smør, brunt sukker, vaniljesukker, fløte og salt i ei gryte, og rør jamnt og trutt til det kokar opp. La det koke friskt i eit minutt, medan du rører. La blandinga kolne litt.

Ha i halvparten av melisen, og rør sausen glatt. Rør i resten av melisen skei for skei, til du har den konsistensen du vil ha. Det er ikkje sikkert du treng alt.

Hell glasuren over den avkjølte kaka, og dryss litt flaksalt på toppen. Nyt.

Øl i maten

Published by

Eg har hatt eit anstrengt forhold til øl heile livet. Dei første tjue åra var det fordi eg var fråhalden, dei neste nesten tretti har det vore fordi eg ganske enkelt ikkje likar smaken.

Men eg har funne ut at øl i maten kan vere heilt fortreffeleg, og det var nyttig lærdom. Øl har ein bitter smak som går dårleg med mine smaksløkar, men når ein lagar mat skal ein ha litt av alt, surt, søtt, salt, bittert og umami, den berømte femte smaken som ein finn i ost, sopp og steikt kjøt, til dømes.

Når ein tilset øl i maten er ølet med sitt tilskot av bitter smak med på å balansere dei andre smakane, og gjere det samla smaksbiletet fyldigare og rikare. Har du ikkje øl i huset kan du erstatte det med litt ekstra væske og ei teskei sennep. Du kan bruke alle typar øl, alkoholfritt går heilt fint.

I dag har eg laga ei gryte med kyllinglårfilet, som ofte er å få i butikken. Då har nokon beina ut kyllinglåret for oss, slik at det reine kjøtet er att. Det egnar seg svært godt til gryter og ovnsbakte rettar. Lårkjøtet er saftigare og mørkare, og dermed rikare på smak enn dei tradisjonelle kyllingbrysta, som kan bli litt tørre og kjedelege i samanlikning. Viss du ikkje får tak i utbeina lår kan du kjøpe rå lår og skjere ut beina, eller du kan lage denne retten av lårstykke som du får ved å dele eit lår i to ved leddet. Då må gjestane dine fjerne beinet sjølve, men det klarer dei fint.

Lårfiletane har eg krydra og linda inn i baconskiver, og så steiker eg dei i panna. Ølet kjem inn ved at eg kokar ut panna med øl etter at kjøtet er steikt. Då får du med alle dei gode smakane over i den eldfaste forma. Å deglasere kallar kokkane den prosessen, og målet er å få ein mest mogeleg smaksrik saus.

I denne retten får sausen i tillegg smak av at eg har fenikkel, squash og løk i botnen av forma. På den måten vert grønsakene bakt saman med kjøtet, og det blir ein klassisk vinn-vinn-situasjon: Meir smak, mindre oppvask.

IMG_6601Kylling i øl og fløte

800 g kyllingfilet

10-12 skiver bacon

Ein stor fenikkel

Ein stor gul løk

Ein squash

2 dl mørkt øl, eg brukte guinness

3 dl fløte

Smør til steiking

Salt og peppar

Set steikeomnen på 200 grader.

Rens løken, skjer tupp og botn av squashen og fjern botnen og tørre endar på fenikkelen. Snitt løken og fenikkelen fint, og fordel dei i ei eldfast form. Kutt squashen i skiver, og så i ”pinnar”. Fordel dette oppå fenikkelen og løken.

Surr kvar lårfilet inn i ei skive bacon, og fest baconet med ein tannpirkar. Smelt smør i ei steikepanne, og steik lårstykka gylne på alle sider. Legg lårstykka oppå grønsakene.

Kok ut panna med øl, og la det koke inn til ca. halv mengde. Slå på fløten, og la det koke nokre minutt. Skrap ut alt frå panna, og hell det over i den eldfaste forma. La det heile bake i 25-30 minutt, til grønsakene er møre, sausen er tjukk og fin, og kyllingen er gjennomsteikt.

Server med ein god salat, ris eller potetmos. Eg serverte den med denne salaten.

Husk å minne folk på å sjå etter tannpirkarane, elles kan det gå gale.

Vil du bu hos oss?

Published by

Vi har lagt huset vårt i Sverige ut på airbnb!

IMG_2278Det betyr at viss du har lyst til å besøke huset vårt, for eksempel feire ein bursdag der, ta med nokre vennar og tilbringe ei veke eller ei langhelg ved Dalslands kanal, så kan du det.

Då kan du leige kano og padle på Laxsjön, eller du kan vandre gjennom naturreservata i nærleiken, sjå på fossane og treffe elgen in persona, slik vi gjorde forrige helg.

Og kanskje kjem rådyra og helsar på i hagen medan du et frukost. Kven veit?

IMG_1982

Og ved dette bordet kan du servere gjestane dine god mat og god drikke. Systembolaget i Bengtsfors ligg fem kilometer frå huset, just sayin». IMG_6210

Sjokoladekake med raudbeter

Published by

Her om dagen lagde eg denne gode salaten med raudbeter i. Pakken med raudbeter inneheldt fire stykke, så når eg sto der og hadde laga ein lekker salat, så hadde eg to kokte raudbeter att. Kva gjer ein då? Bakar kake med dei, sjølvsagt. Ei saftig sjokoladekake vert berre endå betre og meir smakfull med raudbeter i. For ikkje å snakke om sjokoladekremen oppå, som eg berre elskar, utan atterhald. Den er ganske enkelt knallgod.

Kokkar driv og styrer med usalta smør i kaker. Det syns eg er noko fjas. Det gode norske salta smøret er akkurat passe til kaker, og framhevar sjokoladesmaken på ein uovertruffen måte.

IMG_6604Sjokoladekake med raudbeter

250 g kokte og skrelte raudbeter

200 g mørk sjokolade

200 g smør

140 g mjøl

1 toppa ts bakepulver

50 g kakaopulver

5 egg

190 g brunt sukker (kan byttast ut med vanleg sukker)

Varm omnen til 180 grader. Smør ei 24 cm springform med smør rundt kantane, og legg eit bakepapir i botnen på forma før du spenner ringen på.

Skjer raudbetene i terningar, og køyr dei til ein mos i matmølle.

Smelt sjokoladen i mikrobølgeovn eller i vassbad. Rør inn smøret i små terningar, og rør til sjokoladeblandinga er glatt. La den kolne litt.

Sikt mjøl, bakepulver og kakao saman i ein bolle. Skill egga. Pisk eggeplommene til dei skummar. Rør dei inn i sjokoladeblandinga, og vend inn raudbetmosen.

Pisk eggekvitene stive, og rør inn sukkeret. Rør litt til, men det skal ikkje bli marengs. Vend blandinga inn i sjokoladeblandinga, og ha til slutt i mjølblandinga.

Hell røra i kakeforma, og bak kaka i 40 minutt. Sjekk med kakenål eller spagettipinne om kaka er gjennomsteikt. Sit det deig att på pinnen når du tek den ut, må den stå litt til.

Denne oppskrifta fyller altså ei 24 cm form. Mi form var ikkje meir enn 20 cm, men det gjorde at eg også kunne fylle åtte muffinsformer. Sett dei inn i omnen saman med kaka, men ta dei forsiktig ut etter ca. 20 minutt, og la kaka steike vidare. Husk på å sette kaka innerst, du må kunne nå muffinsformene med ein steikespade.

IMG_6620Glasur:

1 dl vatn

2 ss sukker

150 g smør

250 g mørk sjokolade, hakka

Kok opp vatnet med sukker og smør, la det stå på plata til sukkeret og smøret har smelta. Ta kjelen av plata, og rør inn sjokoladen. Rør til den og har smelta. No er denne glasuren ganske tyntflytande, men etter kvart som den kolnar vil den tjukne. Når det har gått ca. ein time er den heilt perfekt i konsistensen. Sprei den på kaka, og sett kaka kaldt. Pynt med det du måtte ha for handa, eg brukte melis på kaka, og granateplefrø på muffinsa.

Med denne kaka (og spesielt denne glasuren) vert du den mest populære påskekokken. Fortsatt god påske!

Påskemat

Published by

No i påska er det koseleg å samlast rundt eit bord med gode vener og gode rettar.

Når ein har fri kan maten gjerne ta litt tid å lage, det viktigaste er at det ikkje er for komplisert, og at ein har tid til å gjere hyggelege ting innimellom. Og sjølvsagt må maten smake godt og gjer alle rundt bordet glade.

Eg let meg ofte inspirere av råvarer, og ikkje minst råvarer som må etast, fordi dei held på å avgå ved døden. Må noko etast fort så kjem eg opp med dei artigaste kombinasjonar, og ofte blir det veldig bra. Denne gongen var inspirasjonen ein pose raudbeter som hadde lege for lenge, og ein salmalaks som holdt på å gå ut på dato.

Kva gjer ein då? Vel, eg sjekka kjøleskapet, og fann ut at eg hadde chevre, løk og reddikar liggande, og når sant skal seiast sang reddikane også på siste verset. Men i ein salat gir dei ein deilig sprø og bitter smak, perfekt i kombinasjon med den jordprega smaken av raudbeter og den feite, gode smaken av chevre. Her kan du også bruke norsk kvit geitost, dei har kome i ulike variantar i det siste, og passar heilt perfekt til raudbeter. Tine sin variant heiter Haukeli, finn du den i butikken så ta den med heim og putt den i salaten.

Eg ville ha med noko søtt og, og heldigvis hadde eg ei nesten umoden pære liggande. Den fekk også vere med i salaten. Eddiken eg brukar er nesten ikkje ein eddik, eg brukar kvit balsamico. Den er veldig god, ganske søt, men frisk i smaken. Finn du den ikkje, så bruk 1 ss eplecidereddik blanda ut med 1 ts honning.

IMG_6609Salat med raudbeter og chevre

To raudbeter

Blanda salat, lollo rosso og issalat er ein god kombinasjon

100 g chevre utan skorpe

Eit knippe reddikar

Ei pære

3 ss limesaft

1 ss kvit balsamico

Salt og peppar

Kok raudbetene i rikeleg med vatn i ca. 50 minutt til dei er møre. La dei kolne på benken, og skrell dei med ein skarp kniv. Fordel salatblada utover eit vidt fat. Skjer reddikane i fire, og fordel dei over. Skrell pæra, og fjern kjernehuset. Kutt fruktkjøtet i fine terningar. Ha dei over salaten.

Kutt raudbetene i terningar, og dryss over salaten. Del chevre-osten i omtrent like store terningar som pæra. Er den veldig mjuk og fersk, kan du også berre smuldre den over. Til slutt ringlar du over limesaft og balsamico, og drysser på litt salt og peppar. Lag salaten like før de går til bords, pærene er ikkje så glade for å vere i friluft i oppkutta tilstand.

Laksen syltar eg i eplejuice og eddik, og serverer med ein urtekrem. Du kan legge urtekremen på fatet, eller ha den i ei skål ved sidan av.

Urtekrem

2 ss gresk yoghurt

2 ss kremost naturell

1 ts tørka dill

1 ts tørka grasløk

Ei klype salt

1 ts honning

Rør alt saman i ei skål, og sett til side.

IMG_6610Eplesylta laks

800 g salmalaks

3 dl eplejuice

1 gul løk

1 ss sukker

2 ts salt

2 ss 7% eddik

Sett omnen på 60 grader.

Skrell løken, og skjer den i båtar. Kok opp eplejuicen med eddik, sukker, salt og løken.

Skjer laksen i passe store bitar, ca. 3×3 cm. Legg laksebitane i ei ikkje for stor eldfast form, og slå på laken. La det stå i 30-35 minutt, til laksen har ein kjernetemperatur på ca. 53-55 grader. Ta laksen ut, og la den kolne i laken. Dette kan du gjerne gjere dagen før. Legg laksen opp på eit fat saman med løken, som også blir sylta med denne framgangsmåten. Server laksen med urtekrem og godt brød.

IMG_6617

Gulrotkake med sultanarosiner og pistasjnøtter

Published by

Gulrotkake er alltid godt, og denne er om eg skal seie det sjølv ekstra god. Grunnen finn du i oppskrifta, den inneheld nemleg litt smør. Smøret gjer at kaka får ei heilt utruleg sprø og god skorpe. Det løftar ei kake for meg, når skorpa smakar godt.

Denne kaka kan godt bakast tidleg på dag viss den skal serverast på ettermiddagen eller kvelden. Det gjer berre at den vert litt fastare i fisken, og lettare å skjere opp. Du kan bytte ut pistasjnøttene med andre nøtter, og sultanarosinene kan byttast ut med vanlege rosiner, eller korintar.

Eg brukte ei randform til denne kaka, men du kan også bruke ei vanleg rundform.

IMG_6539Gulrotkake med sultanarosiner og pistasjnøtter

300 g mjøl

2 ts kanel

2 ts bakepulver

1 ts salt

200 g brunt sukker

4 egg

2,5 dl nøytral matolje

200 g gulrøtter

100 g sultanarosiner

100 g pistasjnøtter, grovt hakka

75 g mjukt smør

Sett omnen på 175 grader. Smør ei 24 cm form godt, og dryss den med mjøl eller semulegryn. Bank av overflødig mjøl eller gryn etter at forma er strødd. Riv gulrøttene fint.

Bland saman det tørre unntatt gulrøtter, nøtter og rosiner. Pisk sukker og egg til ein luftig eggedosis. Bland saman eggedosis og mjølblandinga, og rør inn det mjuke smøret vekselsvis med oljen til slutt.

Vend nøtter, rosiner og gulrøtter inn i kakerøra. Bak kaka i 55-60 minutt på 175 grader. Stikk inn ein spagettipinne eller ei kakenål for å sjekke at kaka er gjennomsteikt når det har gått 55 minutt.

Glasur:

200 g kremost

2 ts ekte vaniljesukker

150 g melis

2-3 ss sitronsaft

Pisk saman alle ingrediensane, til det er ein glatt krem. Smør på kaka, og pynt med det du har for handa. Eg hadde litt kandisert frukt som eg kjøpte på ferie i Italia, den skar eg i tynne skiver og dryssa over kaka.

Vårleg buffé

Published by

Det er den tida vi deler med dei vi er glade i som vi huskar og som gjev livet meining. Så i dag har vi invitert ein liten gjeng vener på lunch. Ikkje noko pretensiøst eller staseleg, men god, smakfull mat som det er lett å like.

Eg dekte opp til ein buffé, då står maten på eit bord eller ein benk, og så set folk seg litt rundt omkring. Det er enkelt, og gjestane kan forsyne seg som dei vil. Får ein ein favorittrett på bufféen kan ein forsyne seg dobbelt utan å vere flau. Og ser ein noko ein er skeptisk til kan ein styre unna.

Eg hadde eit raust stykke røykalaks frå Herøy i frysaren, det vart vel lagt der rett over jul, tenker eg. No fann eg ut at det var på tide å ta den fram, og den var like god. Eg serverte den med ein fenikkelsalat med ein syrleg dressing. Det gjekk veldig godt til den salte og feite laksen. Nokre få kapers gjev eit lite ekstra sting i fenikkelsalaten.

IMG_6531Fenikkelsalat

Ein fenikkel

2 ss kapers

2 ss olivenolje

1 ss eplecidereddik

salt og peppar

Snitt fenikkelen tynt, og ha i ein bolle saman med kapersane. Bland saman olje, eddik, salt og peppar i eit glas med lok. Rist godt, og vinaigretten over fenikkelblandinga. Vend godt, og sett til side.

Anrett laksen på eit fat, og legg fenikkelsalaten oppå.

Pasta Puttanesca er ein av dei aller enklaste pastarettane som finst i det italienske kjøkkenet. Eg ser for meg at dette må vere den pastasausen som husmødrene lagar når dei ikkje har så mykje råvarer i huset.

Tomatar, kvitløk, oliven og ansjos er det som skal til, og sjølv for ein ansjosskeptikar som meg så fungerer denne retten. Ansjos har nemleg den underlege eigenskapen at den nærast smeltar når den vert varmebehandla. Så den er eigentleg mest eit krydder i denne pastaretten. I dag lagde eg den med tagliatelle, men du kan bruke alle typar pasta til denne retten.

IMG_6544Tagliatelle puttanesca

500 g pasta

400 g cherrytomatar

Del cherrytomatane i to, dryss på salt, og bak dei i omnen i 20 minutt på 200 grader

3 fedd kvitløk

6 ansjosfiletar

Ein neve grøne oliven i skiver

500 g tomatar

Ein raud løk

2 dl kyllingkraft, tørr eplecider eller kvitvin

Skrell kvitløksfedda, og knus dei i ein mortar saman med ansjosfiletane. Finhakk olivenane.

Skjer løken i tynne skiver. Kutt tomatane i terningar. Varm opp olivenolje i ei gryte. Fres løken gyllen, og ha i tomatane. La dette frese i 5-6 minutt medan du rører godt på. Slå på 2 dl kyllingkraft, cider eller kvitvin, og la det koke inn. Bland inn kvitløksblandinga og olivenane, og la det koke nokre minutt til.

Kok pastaen til den er ”al dente” i godt salta vatn. Hell av, og ha pastaen i ein varm bolle. Vend inn sausen, og dryss over dei bakte cherrytomatane og vårløken snitta i ringar. Server med godt brød.

Aubergine er ei av mine favorittgrønsaker, og bakt i omn med ostetopping på smakar den heilt gudommeleg. Det skjer noko magisk når aubergine vert salta og varmebehandla, slik er det berre. Pen er den ikkje, men den smakar altså fantastisk.

IMG_6540Bakt aubergine

To auberginar

4 ts raud pesto

2 ss olivenolje

Salt og peppar

Vellagra ost til gratinering

Set omnen på 200 grader.

Del auberginane i to, og legg dei vendt ned i salt på eit fat i eit kvarter. Ha olje i ei steikepanne, og steik auberginen i fem minutt på relativt høg varme. Legg auberginane på eit eldfast fat, og snitt djupt i dei. Smør på pesto, og bak auberginane i 20 minutt på 200 grader. Dryss på ost, og bak dei i fem minutt til osten er smelta og litt gyllen.

IMG_6547

Det nye huset vårt

Published by

Eg har såvidt nemnt det tidlegare, men vi har altså kjøpt oss eit hus eit stykke over svenskegrensa, i Billingsfors.

låftmannsbackeVi overtok huset rett før jul, og rakk berre å fylle huset opp med madrasser og sengetøy frå IKEA før vi vende nasen heimover til Sunnmøre til julefeiring.

I svenskehuset har vi tilbrakt romjula, og vi feira nyttår der. Etter det har vi tilbrakt mange helgar der, og vi nikosar oss.

I byen bur vi kompakt, og må heile tida tenke praktiske løysingar og ein ting inn-ein ting ut. I Billingsfors har vi god plass, og kan breie oss og skape vårt eige hus.

IMG_6210Ikkje for det, huset har sjel frå før vi kom dit. Huset tilhøyrde salgsdirektøren på papirbruket i Billingsfors, og ber vakkert preg av å ha vore eit hus for representasjon og selskap.

Den skikken tenker vi å vidareføre. Det er eit perfekt hus for å ha gjestar, lage mat og kose seg.

Vi overtok huset med møblar, og det betyr at vi har vidareført noko av stilen som salgsdirektøren og kona hans satte pris på.

IMG_6409Nokre av møblane er i mørkt treverk, i taket heng det staselege lysekruner, og vi kan innta frukosten på glassverandaen som vender ut mot hagen, og sjå rådyra spankulere bort for å nappe knoppane av epletreet.

Kjøkkenet ber preg av å vere eit arbeidskjøkken, der ein har hatt tilsette som lagde mat til dei store selskapa. Bak kjøkkenet ligg det eit pikeværelse, og tenarskapet har som seg hør og bør også hatt sitt eige bad og si eiga garderobe.

BadoppeNo prøver vi å gjere det vil vårt, og det syns eg vi har komt godt i gang med.

Mykje skal få bli som det var. Dei fantastiske tapetane, til dømes. Dei fortel historier om levd liv og om stilhistorie frå langt tilbake.

For ikkje å snakke om alt det vakre krystallet og porselenet som sto att då vi overtok. Arvingane tok det dei ville ha, og resten satte dei att til oss. Det set vi veldig stor pris på, og kosar oss med å bruke dei vakre tinga.

IMG_1995I nabolaget er det mykje å sjå og oppleve, det er to naturreservat i nærleiken der ein kan gå tur, i det eine, som grensar mot Laxsjön, er det fine badeplassar og svaberg som ein kan sole seg på. Førebels har vi hatt eit vinterhus, og det fungerer også veldig bra. Det blir varmt og godt med bergvarme og litt fyr i peisen innimellom.

IMG_6571Vi gler oss til å oppleve sommaren her, det trur eg blir minst like fint som å vere her om vinteren. Sist vi var der spira krokus og snøklokker, og i påska må vi stelle bærbuskene som treng ei kjærleg hand. Det blir fint, trur eg.

Huset ligg også på airbnb til leige, sjekk ut denne lenka. 

Brunostpannacotta

Published by

Når det gjeld denne desserten må eg aller først unnskylde meg for å gjenta meg sjølv. Eg veit at vi lagde pannacotta for to veker sidan og. Men denne helga lagde eg brunostpannacotta, og det vart så utruleg godt at eg berre må dele den oppskrifta. Eg lovar at eg skal ikkje kome med fleire pannacottaoppskrifter på lenge. Kors på halsen. Berre du lovar å lage brunostpannacotta. Det er knallgodt!

Eg var innom Mathallen her om dagen, og brunosten eg brukte til denne pannacottaen var ein ekte geitost frå Mjølkerampa, Tine sin utsalsplass for trua ostetypar i Mathallen. Har du ikkje slike fancy brunosttypar tilgjengeleg, så kan du like gjerne bruke gudbrandsdalsost. Alt fungerer, unntatt dei med lite feitt i.

Brunostpannacotta

5 dl matfløte

3 plater gelatin

1 cm tjukk skive av ein brunost (ca. 100 g)

2 ss sukker

Rosiner i rom eller eplejuice

Legg gelatinplatene i bløyt i kaldt vatn i ein bolle. Riv osten på den grove delen av rivjernet. Kok opp fløten, og rør i osten. Rør godt slik at den smeltar ordentleg. Smak til med sukker. Kryst vatnet ut av gelatinplatene. Ta gryta til sides, og rør inn gelatinen slik at den smeltar. Aus opp fløteblandinga i fire porsjonsglas. La dei stå kaldt i minst fire-fem timar.

Server pannacottaen med rosiner som har lege i rom på toppen. Skal du servere dette til barn, sjåførar og fråhaldsfolk, så la rosinene trekke i eplejuice nokre timar før servering.

Eg har heilt gløymt…

Published by

…å seie at eg er jo sjølvsagt på instagram. Der postar eg av og til nokre bilde, så viss du vil følge meg der så heiter eg altså alt_godt. Her ser du eit av bilda eg har posta.

IMG_1944